O Frigoríficos Morrazo Cangas xógase moito máis que dous puntos este fin de semana ante o Quabit Guadalaxara, sobre todo logo da súa última derrota na casa. A cita será o domingo no Municipal David Santamaría da capital alcarreña, ao fin con público nas bancadas.
Os dous equipos chegan ao partido necesitados de puntos, cuestión que se converte en urxencia por parte do club cangués, que está
O conxunto de Cangas venderá cara a súa derrota, xa que o traballo dos últimos días estivo centrado en corrixir os erros no xogo ofensivo e as faltas de concentración que lle condenaron á derrota na casa fronte a outro rival directo, o Liberbank Sinfín.
Cada partido para o Quabit é "o máis importante, como unha final", como adoita dicir o seu adestrador, pero medirse a un rival directo como o Cangas e na casa obriga aos morados a dálo todo por sumar unha nova vitoria. A situación é similar no cadro do Frigoríficos Morrazo, que necesita canto antes sumar dous novos puntos e non descolgarse dos equipos que lle preceden na clasificación.
O adestrador do equipo alcarreño non as ten todas consigo. "Cangas empatou en pistas complicadas como as de Cuenca ou Aranda e na casa con Puente Genil", advertiu, adiantando ademais que "será un partido complicado, xa que os cangueses, realizan unha defensa 6-0 moi intensa e agresiva, cun bloque central contundente nos momentos precisos".
Así, Ortega explicou que "en ataque, teñen unha primeira liña con gran capacidade de lanzamento, con Muratovic activo nas zonas centrais, ben escudado polos outros laterais e facendo unha boa conexión co pivote", polo que adiantou que "van dar guerra, segurísimo".
CON PÚBLICO. José Javier Hombrados, capitán e porteiro do Quabit Guadalaxara, non dubida á hora de que o seu equipo ten que "evitar custe o que custe" que o Cangas leve puntos da súa casa, aínda que "eles tamén están necesitados e porannos as cousas difíciles".
O equipo local conta coa vantaxe de que, de novo, regresa o público ao seu pavillón. Hombrados explicou que "vai ser estraño ver público nas bancadas" ante a súa volta este domingo ao Pavillón David Santamaría . "Alégranos moito que o público de Guadalaxara poida presenciar os partidos, e canto máis público mellor", afirmou con vistas ao choque que disputa este domingo ante o Frigoríficos Morrazo.
As espadas están en todo o alto e os cangueses necesitan os dous puntos como auga de maio.
