O Grupo Deportivo Supermercados Froiz é aínda máis líder do ranking nacional tras o triunfo por equipos e individual (con Óscar Brea) da Volta a León. O conxunto alimenticio conta ademais con Sergio Vega na terceira posición da clasificación individual con 1.099 puntos.
Galicia é a clara dominadora do ranking nacional por equipos. O Grupo Deportivo Supermercados Froiz mantense á fronte da táboa con 2.990 puntos, mentres que o Club Ciclista Rías Baixas é terceiro con 2.046. No medio, con máis de 600 puntos menos que os homes de Evaristo Portela, atópase o Gsport Wolfbike (2.332).
Este bo rexistro deixa claro que o Froiz é o equipo máis regular da tempada, a pesar de non obter un bo resultado na Volta a Vetusta (a última competición disputada ata agora). Aínda así, o resto do curso foi bastante satisfactorio e, agora, os homes de Evaristo Portela prepáranse para disputar a Volta a Galicia a finais de setembro, unha cita na que é o gran favorito.
Con todo, as alegrías para o Grupo Deportivo Supermercados Froiz non veñen só polo colectivo, senón tamén polo individual. O cántabro Sergio Vega mantén a terceira posición na clasificación individual do ranking nacional con 1.099 puntos, por detrás do valenciano Eusebio Pascual (Mutua Levante - 1.163 puntos) e do murciano Antonio Jesús Soto (Lizarte - 1.799 puntos).
O Grupo Deportivo Supermercados Froiz está a un paso de gañar o ranking nacional tras varios anos sen facelo. Sería a oitava vez na súa historia que conseguiría ese fito. Para iso, Evaristo Portela xa ten planificado o resto do calendario, aínda que irá ás diferentes probas sen presión. "Non queremos correr riscos, porque temos que regular para chegar ben á Volta a Galicia", engade o director deportivo da entidade ciclista.
Desta forma, o equipo correrá en Salamanca, en Cantabria, en Vigo, en Valencia e en Portugal. No país veciño participará na Volta do futuro, destinada a corredores sub-23 e que contará cun nivel altísimo.
"Os logros do Froiz veñen do traballo de moita xente", recoñece Portela, satisfeito polo bo momento no que se atopa o persoal, e recorda que León é unha das voltas que máis puntúa e nela lograron uns 700 puntos. O dirixente tamén é cauto con respecto á Volta a Galicia. "Se o facemos mal, non hai opción. Temos un equipazo e se chega como ten que facelo, irá ben. Despois podes gañar ou non", conta, ao que engade que "agora imos despaciño, sen malgastar nada".
Polo momento, a directiva do Froiz está a analizar quen vai a cada unha das competicións, aínda que o ten practicamente claro. O obxectivo é que os ciclistas sigan activos, pero sen gastar demasiadas enerxías de cara ao obxectivo de final de tempada. Un dos homes crave para a Volta a Galicia será Sergio Vega, que tras un breve descanso está a retomar o ritmo de competición. Outro dos ciclistas que está a intentar porse a punto é Lestido.
Con todo, pase o que pase nesa proba, a tempada é satisfactoria. "Xa cumprimos", di Portela.
