A quinta edición do Torneo Antonio Suárez de fútbol sala achegou a Marín o mellor espectáculo futbolístico de base esta fin de semana. 800 xogadores de 57 equipos, encadrados en sete categorías diferentes, demostraron a súa mellor versión neste evento que xa se converteu en referencia deste deporte en Pontevedra e arredores.
Os pavillóns da Raña, O Sequelo e San Narciso acolleron máis de 50 encontros durante a xornada do sábado, dos que saíron os mellores equipos de cada categoría que este domingo disputaron as semifinais e grandes finais en busca do trofeo de campións.
En categoría biberón, o anfitrión, a ED Marín, levou o triunfo ao gañar ao Leis Pontevedra. Con todo, o resultado era o de menos.
No caso dos prebenxamíns, o AD FS Bueu conseguiu o primeiro posto do campionato ao vencer na gran final ao Paco Sedano. Os do Morrazo foron os mellores do total de seis equipos que se disputaban o premio nesta categoría.
En categoría benxamín, o Inter Movistar obtivo o primeiro posto tras vencer na quenda de penaltis ao Academia Paco Sedano.
O Inter Movistar impúxose por dous goles a un ao Noia Futsal facéndose co primeiro posto na categoría alevín, unha das máis igualadas, onde se atopaban os grandes equipos da comunidade galega.
O anfitrión do torneo, a ED Marín Ponfincas, levou o trofeo de campión en infantís, tras imporse no encontro final da categoría, disputado na Raña, ao Santiago Futsal.
En cadetes, o Inter Movistar logrou o seu segundo título da fin de semana tras imporse na gran final a Santiago Futsal. O resultado final do encontro foi de 2-1, reflectindo a grande igualdade entre os dous equipos sobre a pista.
En xuvenís, o Pescados Rubén Burela evitou, na quenda de penaltis, que o Inter Movistar levase a cuarta coroa da tarde. O tempo regulamentario finalizou con empate a un e o bloque laranxa levou finalmente o triunfo.
Tras a disputa de todas as finais, que se celebraron durante a primeira metade da tarde, procedeuse na Raña á entrega de trofeos e cerimonia de clausura que puña o punto e final a unha gran fin de semana de fútbol sala.
A quinta edición do trofeo Antonio Suárez volveu ser un éxito de participación, a grande afluencia de equipos e xogadores obrigou a que o San Narciso tamén albergase encontros durante toda a fin de semana.
A festa non só se viviu sobre a pista dos pavillóns, onde os xogadores das diferentes categorías demostraron os seus dotes na disciplina de balón, senón que tamén as bancadas viviron a súa propia festa. Os familiares e amigos encheron as bancadas para animar, cantar, dar alento e gozar do gran número de partidos que se celebraron.
Marín e o fútbol sala gozan dunha incrible relación que, cada ano, afiánzase máis coa celebración de eventos como este memorial Antonio Suárez.
