O Poio non puido dar a sorpresa na súa visita a Navalcarnero e no duelo estelar da xornada, cos dous equipos invictos que lideraban a competición fronte a fronte, caeu ante un rival que fixo valer a súa calidade individual e a súa experiencia. O tanto de Antía fixo albergar esperanzas ao cadro pontevedrés tras un mal inicio, pero as pupilas de Manu Cossío acabaron claudicando ante o poderío do conxunto máis laureado do fútbol sala feminino. A mellor noticia para o Poio resultou o retorno ás canchas de Clara logo de nove meses de ausencia.
O comezo do duelo resultou trepidante na Estación. Ambos os equipos saíron con moita intensidade, con ganas de demostrar que se xogaban o liderado do grupo. A primeira parte foi de ida e volta e os tantos non tardaron en chegar.
No 1-0 Amelia Romeu conduciu o balón e superou coa súa perna destra a Caridade. Estreaba así o marcador no minuto 2. Pouco despois, de falta, Ari anotou o segundo tanto do conxunto madrileño. O Poio non se amedrentou. Subiu o cadro pontevedrés as liñas, presionando en tres cuartos de campo e sendo agresivo na primeira liña atopou o gol por medio de Antía, de falta.
O Poio se reenganchaba ao encontro. O gol deulle confianza e tivo as súas opcións para o empate. Con todo, no último suspiro do primeiro tempo Irene estirou as diferenzas para o Futsi.
Se foi un mazazo o 3-1, para as pupilas de Manu Cossío resultou letal o 4-1 tras volver dos vestiarios. As arremetidas do Poio por medio de Dani Sousa e Antía non foron suficientes para cambiar a dinámica de un duelo que aínda viu dous goles máis dos locais.
FICHA TÉCNICA
Poio Pescamar: Caridade, Miri, Luci, Ana Rivera e Dani Sousa -quinteto inicial Agostina, Antía, Clara, Iraia, Irene García e Julia Dupuy. Convocada sen xogar: Carol.
Goles: 1-0 Amelia Romeu (min. 2). 2-0 Ari (min. 5). 2-1 Antía (min. 11). 3-1 Irene (min. 20). 4-1 Ari (min. 23). 5-1 Marta Valbuena (min. 31). 6-1 Irene (min. 40).
Árbitros: Jarque Ruiz e Manso Martín (Comité madrilerño). Expulsaron á porteira local Belén (min. 10). Ademais mostraron cartón amarelo a Amelia Romeu e Alberto -adestrador axudante- por parte do Futsi e a Clara polo Poio.
Incidencias: Polideportivo A Estación. Partido xogado a porta pechada
