O Centro Galego de Tecnificación Deportiva (CGTD) de Pontevedra incorporará dúas novas disciplinas á súa oferta formativa para novas promesas do deporte, ao sumar ximnasia e natación artística a partir do próximo curso 2021-2022.
En concreto, o centro aceptará dous deportistas residentes en ximnasia e, no caso da natación artística, serán tres residentes e unha praza máis en réxime externo.
Con estes dous novos deportes, serán catorce as disciplinas nas que se formarán os 160 mozos deportistas que cursarán os seus estudos no centro pontevedrés.
Atletismo, bádminton, judo, kárate, loita, natación pura e augas abertas, natación artística, piragüismo slálom e augas tranquilas, remo, taekwondo, tríatlon, vela e ximnasia son os deportes que contarán con prazas de tecnificación o próximo curso.
O CGTD naceu no curso 1987-88 aproveitando as instalacións do Estadio da Mocidade e a residencia de estudantes Atlántico da cidade de Pontevedra. Na actualidade, acolle aos principais deportistas e promesas do deporte galego.
Ao longo da súa traxectoria, son 22 os deportistas olímpicos que se formaron neste centro de tecnificación, incluídos Caetano Horta (remo) e Antía Jácome (piragüismo) que debutarán nos xogos de Tokio 2020. A estes 22 hai que sumar outros dous paralímpicos.
Entre todos eles conseguiron once medallas olímpicas desde Sidney 2000.
