A selección española de balonmán comezou este martes a súa preparación para os Xogos Olímpicos de Tokio que levará a cabo na provincia de Pontevedra, con estancia en Sanxenxo e as sesións de adestramento na propia Boa Vila, onde tamén se disputará o primeiro encontro da concentración.
Os Hispanos, co gardameta de Cangas Rodrigo Corrales entre eles, aterraron este martes á mañá no aeroporto Rosalía de Castro, de Santiago de Compostela, en dúas quendas diferentes. Unha vez en terra puxeron rumbo á vila costeira das Rías Baixas onde chegaron ao redor das 10.30 horas, para comezar a concentración cunha primeira charla do seleccionador Jordi Ribeira.
Xa pola tarde o combinado nacional desprazouse a Pontevedra para levar a cabo, ás 19.00 horas, a súa primeira sesión de adestramento con todos os efectivos dispoñibles, na que foi unha primeira toma de contacto para os xogadores e os membros do corpo técnico e que tivo algo máis de dúas horas de duración.
🇪🇸🤾🏻♂️ ¡Primer entrenamiento para los #Hispanos en @Pontevedrate @depo_es!
— RFEBalonmano (@RFEBalonmano) June 22, 2021
🇯🇵🛫 ¡La preparación para los @juegosolimpicos @Tokyo2020es YA ESTÁ EN MARCHA!
#️⃣ #Tokyo2020 pic.twitter.com/VTpPMvnzi1
Deste xeito os Hispanos xa puideron pisar e probar, por primeira vez nas dúas concentracións que levarán a cabo na Boa Vila, a pista do Pavillón Municipal dos Deportes onde o vindeiro domingo farán a súa posta de longo e disputarán o primeiro encontro da preparación para os Xogos.
Ante algo máis de 500 espectadores (os permitidos para os encontros ligueiros do Cisne e o Teucro durante o último tramo da tempada) e co aforamento completo debido á rápida venda de entradas, os homes de Jordi Ribeira disputarán o primeiro partido de preparación o vindeiro domingo. Este duelo, correspondente á Xornada 3 da EHF Euro Cup 2022, será ante Croacia e dará comezo ás 20.00 horas, ante un público expectante de ver aos mellores xogadores do balonmán español.
Pero ata entón o combinado nacional continuará dividindo o seu día a día entre Sanxenxo e Pontevedra, da mesma xeito que fixeron este martes no seu primeiro día nas Rías Baixas. Os Hispanos tiveron que adaptarse a unha concentración en formato burbulla, cun hotel ao completo á súa disposición xa que o camiño cara a Tokio está a chegar ao seu final e desde a Federación Española de Balonmán non queren correr riscos e extremaron a seguridade ao máximo posible.
Os Hispanos aterraron en dúas quendas en Santiago e puxeron rumbo a Sanxenxo, onde chegaron sobre as 10.30 horas
LISTA. Neste primeiro stage Jordi Ribeira ten á súa disposición a 20 xogadores, unha lista que non é definitiva de face a Tokio, xa que a convocatoria final sairá despois da segunda quenda de preparación (do 4 ao 9 de xullo).
Entre as novidades do combinado que xa está en Pontevedra atópase Antonio García, que regresa á selección cinco anos despois. O propio lateral esquerdo asegurou este martes, nada máis chegar a Sanxenxo, que ten «moitísima ilusión e ganas por volver estar aquí, co mellor grupo posible para xogar ao balonmán».
García, xunto co resto dos Hispanos, xa se atopa na que será a súa casa durante os próximos días.
