O Pontevedra acelera de face á próxima tempada. Logo de anunciar once baixas durante a mañá do mércores o club comezou o proceso de oficializar as novas incorporacións. As dúas primeiras foron as do mediocentro Imanol García e o extremo Óscar Fernández. E nas próximas horas faranse oficiais máis, xa que o club ten pechados a Borja Martínez ou ao porteiro Mario Fernández, segundo insinuou o pasado luns o xornalista Ángel García na súa conta de Twitter @
A traxectoria deportiva de Imanol García, que cumprirá 25 anos en decembro, non pasou desapercibida para o club pontevedrés. O director deportivo, Roberto Feáns, e o adestrador, Jesús Ramos, buscaban un futbolista capaz de dotar de presenza física o centro do campo e entenden que o pamplonés é unha gran opción. O mozo criouse en Osasuna e é irmán de Unai García, actual xogador rojillo (con quen compartiu aliñación). De feito, chegou a debutar en Primeira División co seu club de formación na tempada 2016-2017, contra o Celta de Vigo no Sadar. De Tajonar pasou ao Vilarreal CF B e ao Nástic de Tarragona, antes de fichar polo Córdoba, o seu último club. No Arcanxo coincidiu con Enrique Martín, o técnico que lle fixo estrearse na máxima categoría, na que acumulou oito partidos e 525 minutos.
Tras o seu paso polo Vilarreal, regresou a Osasuna para estrearse tamén en Segunda División. Polo tanto, conta con experiencia nas tres primeiras categorías do fútbol nacional. Tamén en Terceira, xa que a tempada 2015-2016 foi a máis prolífica en cantos a termos goleadores. Anotou cinco tantos en 38 partidos no Grupo 15.
Imanol García, unha peza cobizada na Segunda B, chega ao Pontevedra tras xogar case todo co Córdoba, quinto no Grupo IV.
Doutra banda, Jesús Ramos tamén ten a seguridade de contar xa de face ao próximo curso con Óscar Fernández. O xogador cántabro destaca por ser un extremo vertical. O destro disputou 26 de 28 partidos posibles entre o Barakaldo, club co que empezou a competición, e o Don Benito, tamén do Grupo IV. Con todo, no seu caso, tan só contou con dez titularidades. O xogador de banda exerceu máis o papel de revulsivo, xa que apenas superou os 1.100 minutos de xogo.
A pesar diso, Fernández é un xogador contrastado na categoría, xa que conta con máis de 100 aparicións. Tamén nacido no ano 1995, pasou polo Racing de Santander tras saír do Atlético Perines. Xa vinculado ao Alcorcón (onde non chegou a debutar), o pasado curso foise a préstamo ao Fuenlabrada e a metade de curso ao Castelló. Tras rescindir contrato co conxunto oleiro, esta última campaña tampouco atopou unha estabilidade que agora busca en Pasarón, onde se lle considera un xogador moi interesante polas súas características de extremo puro, capaz de achegar desequilibrio e dinamismo ao ataque granate.
Charles
Onte, o Eibar anunciou que Charles Dias non seguirá no club armeiro. Deste xeito, a punta queda libre e ten a oportunidade de regresar ao PCF, como anunciou hai pouco que lle gustaría.
Charles non seguirá no Eibar e aínda que o interese do Pontevedra no seu regreso é evidente, o seu retorno é complexo
A pesar do evidente interese granate, o retorno do atacante non é sinxelo polo cartel que o xogador ten en Segunda.
