Xusto o día antes do último encontro da tempada (o Pontevedra CF enfróntase este venres ao Atlético de Madrid B), Javi López compareceu ante a prensa para explicar as súas sensacións tras a rotura do ligamento cruzado e confirmou que será operado na cidade do Lérez o día 8 de xaneiro.
"É duro, pero agora no único que penso é en recuperarme ben. Tanto os compañeiros, como o corpo técnico e todo o club en xeral estanmo pondo moi fácil, porque son os primeiros que me están animando día a día. Ao final, non tes tempo de pensar en nada nin en virte abaixo, só en ser forte e recuperarte o mellor posible, pero neste tipo de lesións non hai que ter présa", explicou o futbolista.
O malagueño nunca antes tivera unha lesión grave, pero admite que "oxalá sexa a última" e asegura que non se marca prazos, senón que empezou a traballar en piscina para fortalecer a perna en xeral. "Penso xa na pretemporada. Só quero operarme canto antes", comentou.
Javi López márchase este venres a Málaga e volverá ao traballo o mesmo día que o resto dos seus compañeiros, o 31. Aínda así, seguirá realizando traballo específico todos estes días de descanso, que lle valerán para prepararse de cara á operación.
