O deporte como medio de superación ante as adversidades. Iso é o que tratou de transmitir a paratriatleta Susana Rodríguez aos alumnos do CPI Julia Bacerra Malvar de Ribadumia. E é que a actual medallista de ouro olímpica e mundial acudiu este mércores ao municipio ribadumiense para ofrecer aos estudantes de Secundaria unha charla sobre a súa vida e o seu exemplo como encarnación de moitos valores útiles para convivir en sociedade e desenvolverse como persoas.
A conferencia ofrecida pola viguesa, que ademais de paratriatleta é fisioterapeuta e médica, englobouse dentro dun proxecto de Lingua Castelá dos alumnos de Terceiro de ESO dirixido pola docente Silvia López. "Os estudantes organizaron todo: o auditorio, unha entrevista persoal previa, o dossier de prensa, unha presentación de dous minutos que fixeron ante o resto dos seus compañeiros e un pequeno detalle que tiveron con Susana", comenta López, que valora moi positivamente a experiencia de que os mozos poidan escoitar en primeira persoa un exemplo como Rodríguez.
"Valoramos moito a súa presenza. A charla estaba prevista para o ano pasado e non puido ser polos seus adestramentos. Pero este ano, a pesar de que ten a axenda chea, cumpriu co prometido. Foi unha grande oportunidade", explica a profesora.
Deste xeito, durante a súa intervención, Rodríguez repasou cos estudantes a súa traxectoria vital apoiada en soporte audiovisual. Unha traxectoria marcada por grandes fitos a pesar da súa discapacidade. "O deporte é a miña vida", recoñeceu aos mozos, aos que animou a esforzarse porque todas as persoas "poden facer moitas cousas se o propoñen".
"Foi un gusto escoitala. Eu espero que o que dixo lles quede aí aos alumnos e incluso axude a algúns dos nenos máis introvertidos: o deporte pode ser unha boa vía para superar os seus problemas, como lle pasou a ela", reflexiona a profesora.