Luismi xa ten claro a que vai xogar o Pontevedra esta tempada e con quen o fará. Así o explicou este venres na rolda de prensa previa ao enfrontamento deste sábado (20.00 horas, A Malata) ante o Racing de Ferrol no Torneo Vitoria 'Memorial Moncho Rivera'.
"Teño dous ou tres dúbidas, pero o que é a base do equipo si que a teño xa en mente. Queda tan só unha semana, polo que máis ou menos xa o sei. O partido do sábado e o do mércores (ante as Lavercas) espero que sirvan para aclarar os detalles", engadiu.
Antes do enfrontamento entre Ferrol e o PCF, os xuvenís do Racing disputarán un amigable ante unha selección de afeccionados
O encontro deste sábado tamén valerá para dar minutos a Mikel Arruabarrena. "Fáltalle ritmo de competición, pero ao final vén de onde vén e esas cousas nun futbolista ven. Ten detalles de calidade, presenza e saber estar. Logo de xogar tantos partidos en Primeira, con pouco lle vale para adaptarse ao equipo. Estamos moi contentos con el", comentou Luismi.
"É un partido que dá pé a ser un ensaio xeral: polo rival e polo estadio (A Malata). Creo que é unha boa proba para saber, a unha semana de que empece a liga, en que condicións estamos, como foi a pretemporada e terminar contra un rival esixente. é un equipo que nos porá, seguro, as cousas moi complicadas", engadiu.
DEFENSA DE TRES. Un dos aspectos que ensaiou o Pontevedra CF no encontro ante o Bergantiños foi a defensa de tres. Luismi ten claro que a súa idea de xogo será un 4-4-2, pero asegura que necesita variantes para afrontar "todas as situacións que se poidan dar durante os partidos". "Seguirémolo traballando durante a tempada, pero no que máis profundamos é na defensa de catro", engadiu.
O home elixido para o centro desa defensa foi Álex Fernández. O centrocampista é experto na saída de balón desde atrás e iso deu un plus ao conxunto granate. Aínda así, o Pontevedra CF aínda debe perfeccionar ese sistema de xogo. De feito, podería polo en práctica nalgún momento ante o Racing de Ferrol, un equipo confeccionado para regresar a Segunda División B, "con moitos xogadores que poderían disputar esa liga esta tempada, polo que a esixencia vai ser maior", explicou Luismi.
Doutra banda, comentou que "é importante que o futbolista teña boas sensacións, porque ao final vives disto. Están a ver que o que traballamos está a facerse ben e iso axuda a que crean na túa idea". De feito, fixo fincapé en que o nivel de cada rival ao que se enfrontaron non é o máis importante, xa que "uns serán mellores e outros peores, poranche máis ou menos dificultades que outros, pero todos van facelo ben e contan coa motivación de xogar contra o Pontevedra. Estamos contentos e satisfeitos por como vai a pretemporada, pero máis que polos resultados, polas sensacións que estamos a ter".
Desta forma, o Pontevedra CF ten este sábado unha nova oportunidade para manterse invicto nesta campaña de preparación previa á tempada.
