A presidenta do Pontevedra, Lupe Murillo, quixo comparecer brevemente ao termo do partido para "dar as grazas a toda a xente que veu a Pasarón" e entoar un mea culpa pola mala tempada do equipo. "Levamos unha época practicamente sós no campo e era necesario. Grazas de verdade porque a pesar de onde vimos e de como viñamos estiveron aquí este domingo para apoiarnos. Neste club nada foi fácil, pero é certo que demos a talla, demostramos que podiamos facer un bo partido e todo saíu redondo", apuntou.
Tras este agradecemento, a máxima dirixente recoñeceu que ela podía ter "parte de culpa" nesa "ilusión que creamos todos". "Creo que toda esa ilusión coa que empezamos transmitímoslla a moita xente e estivemos sufrindo durante toda a tempada. O meu síntoo é por aqueles sufridores que do mesmo xeito que moitos de nós estivemos pasando unha malísima tempada. Simplemente grazas e síntoo", aseverou.
