O Peixegalego non continuará en LEB Ouro a próxima tempada salvo un milagre de última hora. As novas medidas que fixo públicas a Federación Española de Baloncesto o pasado venres foron, canto menos, prexudiciais para o club marinense, que ve "moi negro" poder manterse o próximo ano na categoría. Os conceptos económicos que publicou a FEB non son compatibles co capital do que dispón o club da vila, que non poderá facer fronte aos pagos esixidos para salvar división.
"Levamos tres meses esperando a que dixesen algo, e agora as respostas que nos sorprenden aos clubs que pasamos por dificultades, non é outra que a dúas semanas de facer a inscrición véñennos cunhas medidas que son máis leoninas que o eran a semana pasada, e refírome a temas económicos". Con esas palabras mostra o seu descontento Luís Santiago, un dos mandatarios do club marinense, que ve como o esforzo deportivo do Peixe vaise pola borda de face á próxima campaña.
A Federación fixo pública o venres a data límite de prazo de inscrición a LEB Ouro que será o próximo 17 de xullo ás 13:00 horas, día no que os clubs deberán depositar o aval de 150.000 euros e a contía de 36.000 euros como rexistro para a próxima tempada na división Ouro. "O deportivo aquí parece que non conta, aquí só interesa o económico", lamenta Santiago.
Outra das novidades que terá a categoría será a creación de dous grupos. "Nós non podemos soportar uns gastos así" sinala Luís, facendo referencia ás viaxes que o club deberá custear en caso de permanecer na categoría, que sumaría a cifra de 50.000 euros e "é imposible para nós". Ademais, Santiago asegura que se sabe fehacientemente que van baixar as axudas cara á cultura e o deporte. Outras federacións fixeron fronte a isto, pero a Federación de Baloncesto mirou para outro lado e en lugar de alivialo, endureceuno un pouco máis .
Con estas medidas, o Peixegalego esquécese de repetir a aventura en LEB Ouro a próxima tempada "a menos que ocorra un milagre", posto que o club de Marín atopouse con que os acordos que se negociaron durante os últimos tres meses non se levaron a cabo. "Dixérannos que se ía a pagar a metade da inscrición e mantíñase o aval", algo que finalmente non se levou a cabo. "Isto só pasou en Ouro, no resto de categorías isto non pasou".
Atrás queda o gran labor deportivo que arrastra o Marín PXG tras lograr hai catro anos o primeiro ascenso á primeira categoría. "Demostramos que somos capaces de todo". Por iso, o Peixegalego, que contaba coa esperanza de manterse vivo na categoría o próximo curso despois do sufrimento deportivo desta tempada, viu como se esfuman as súas ilusións. "Se non ocorre un milagre, non presentaremos a cantidatura ou pagaremos a inscrición e esperaremos a ver se hai algún movemento, pero o vexo moi difícil", resume Luís Santiago, deixando así por terra calquera indicio de optimismo para o próximo curso.
