As renovacións para a nova tempada ligueira en Pasarón non só chegan en forma de xogadores, tamén o corpo técnico do conxunto lerezano está a vivir unha auténtica revolución, encabezada polo recentemente estreado fichaxe de Ángel Rodríguez como técnico granate.
O certo é que o club aínda mantén un halo de incerteza sobre a confección do equipo que dirixirá aos da Boa Vila en 2RFEF. Pero Sergio Moreira, ata agora adestrador do Pontevedra B, non puido evitar cambiar a súa biografía de Twitter para anunciar que será a man dereita de Ángel Rodríguez.
O técnico non só modificou a súa condición de adestrador da filial a segundo adestrador do Pontevedra CF, senón que tamén expresou no seu perfil desta rede social que chegan para el "novos retos", os cales afronta "con toda a ilusión do mundo".
En declaracións a este xornal, Moreira confirmou a súa despedida do Pontevedra B aínda que non quere falar da súa incorporación ao corpo técnico do primeiro equipo ata que o club o faga oficial.
O que foi adestrador da filial estes últimos anos di adeus á canteira logo dun gran ano co Pontevedra B para dar o salto da man de Ángel Rodríguez.
Toni Otero e o resto da directiva granate depositan así a súa confianza nun home da casa, que ademais coñece de primeira man aos futbolistas das categorías inferiores, o que podería animar ao novo adestrador do club da Boa Vila a apostar pola canteira na próxima tempada en 2RFEF.
De momento, o que será segundo de Ángel Rodríguez está en negociacións co club, que decidiu non facer o anuncio oficial aínda. Pola súa banda, Moreira si confirmou estar en conversacións coa directiva, coa que se reuniu, ademais de falar con Ángel Rodríguez na noite do xoves. Previsiblemente, o técnico granate e o seu compañeiro volveranse a reunir o luns.
OBXECTIVOS. Se de algo sabe Sergio Moreira é de marcarse metas ambiciosas ao comezo da tempada. Así o fixo o pasado ano cos seus pupilos do Pontevedra B, e non lle foi nada mal ao técnico, xa que conseguiu manter aos seus con opcións de loitar polo ascenso ata a última xornada.
Un partido no que a filial goleou, pero non lle valeu para clasificarse para a Fase de Ascenso á Terceira RFEF.
A pesar da sensación agridoce coa que pechou a tempada, Moreira mostrábase satisfeito de manter ao equipo entre as dúas primeiras prazas ata o último partido. Unha actitude inmellorable para o que será o conselleiro de Ángel en 2RFEF.
