CANDO Os recursos non son acordes á categoría e méritos deportivos dun club, só queda redobrar esforzos para manter o nivel e imitar aos xigantes. No medio da fauna do baloncesto profesional móvese o pequeno Peixe, unha institución humilde que trata de sobrevivir co mínimo, grazas ao esforzo dos seus traballadores. Un deles é Diego Gómez (Ourense, 1989), o home "multifunción" do Peixe.
Segundo adestrador de Javi Llorente, dedícase tamén aos labores de scouting e edición de vídeo, así como aos adestramentos específicos, a coordinación dos xogadores de base co primeiro equipo e a dirección dos conxuntos júnior e infantil masculino do club. E ademais, exerce de enlace cos estranxeiros do equipo a través do seu papel de tradutor de español a inglés e viceversa, xunto á xestión de calquera trámite necesario e habitual dentro da estrutura de calquera club. Un traballo infinito que non tería razón de ser de non existir algo máis que un vínculo económico coa institución.
A Licenciatura de Publicidade foi o factor que comezou a unir as vidas de Diego e o Marín alá polo 2007. O ourensán trasladouse a Pontevedra para cursar a carreira e aproveitando, fichou por un Peixe por aquel entón en EBA. "Eu tiña 18 anos e cheguei ao equipo. Alí estaba Javi Llorente como xogador. Comezamos sendo compañeiros, pero el lesionouse e só puidemos xogar catro partidos xuntos", recorda Gómez.
Entón, Llorente pasou a exercer como axudante de adestrador para aprender o seu novo oficio e o que era o seu igual, converteuse no seu superior. "Empezou a botar unha man e quizá porque fora o meu compañeiro, eu non o vía como o meu adestrador como tal", explica o ourensán, que compartiu esa e dúas tempadas máis co actual técnico do Peixe naquela etapa. Logo Diego foise para xogar no Cambados, "no seu COB" (co que debutou en Prata) e no Chantada, club no que terminou a súa carreira: "Déixalo porque ves xa non vas progresar máis. Gustábame moito xogar e adestrar sempre foi algo que me chamou".
Diego Gómez compartiu pista con Javi Llorente catro partidos. Oito anos despois, o leonés chamou para integralo no seu 'staff'
Así, comezou a dirixir a equipos de base en Ourense durante tres tempadas, ata que na tempada 2015-2016, coincidindo co ascenso do Peixe a Ouro, Javi Llorente acordouse del. "Él non me coñecía como adestrador, pero si que falabamos moito de baloncesto cando coincidimos e dásche conta de que ves moitas cousas de forma parecida, á hora de analizar un partido por exemplo", apunta o da cidade das Burgas, que acabou aceptando a oferta e regresou ao Peixe. "Chegaba para botar unha man. Germán Lozano era o preparador físico e Victor Holmberg o axudante de Javi. Tratábase de que vivise e vise toda a dinámica dun primeiro equipo, sempre desde o punto de vista do adestrador", expresa.
Naquel momento, o actual segundo adestrador peixista non se puña unha meta sobre a súa segunda estancia na Raña. Só movíalle a ilusión: "Coñecía o club e sabía que ía estar ben. O meu obxectivo era continuar se a institución e Javi querían, pero non me puña unha data".
E así, acumula xa catro anos de novo no Peixe. Os tres últimos, como asistente principal de strong <>Javi Llorente. Con todo, esta non é o seu único labor dentro dun club de persoas que traballan como formigas. Só así se entende como unha entidade tan humilde acumula tantos anos coqueteando coa elite. "Éste é un sitio pequeno e apenas hai medios con respecto aos nosos rivais de categoría. Pero sabemos o que temos e remamos todos na mesma dirección", destaca o ourensán, que tamén prepara todo o referente á análise dos rivais (agora xunto a Pedro, "un gran apoio"), adestra dous equipos da base, dirixe adestramentos específicos e actúa como tradutor, un papel fundamental nos últimos anos: "O inglés xa o traía, non tiven que gastar tempo en clases. O francés téñoo esquecido. En canto á expresividade, si que trato de ser fiel á mensaxe de Javi. Hai que salientar como el para que non se perda información".
É o traballo de horas, horas e horas día e noite de Diego Gómez, o home máis polivalente do Peixe, aínda que el non se queira vender, como bo publicista. Nótase que aínda ten pendentes materias.
