Luismi Areda teno claro, o partido ante o Xetafe B deste domingo non é unha final, pero si un encontro de gran importancia debido á situación do equipo. "Non o vexo como unha final. é un partido importante xa que vimos de dúas derrotas e ao chegar nesta situación cobra máis importancia", asegurou o técnico granate en rolda de prensa, que engadiu que "non o considero unha final porque hai máis partidos".
O adestrador vigués, que non sentará no banco de Pasarón por sanción, é consciente de que a situación non é a máis idónea e esperada, por iso destacou que "hai que intentar romper a dinámica negativa e gañar. Volvemos xogar en casa. Queremos gañar aquí, ante a nosa afección, ter outras sensacións e quedarnos cos tres puntos".
Tras dúas derrotas consecutivas a situación do bloque granate non é a máis positiva posible. Por este motivo o técnico ten claro, e así llo intentou transmitir aos xogadores durante esta semana, que a situación do rival na clasificación non é o máis importante, senón que "temos que ver por nós e pola necesidade que temos de gañar".
Vimos de dúas derrotas, queremos volver gañar e non estamos para fiarnos de ninguén
O Xetafe B chega a Pasarón como faroliño vermello do grupo, pero Luismi sabe que para poder levar os tres puntos do partido o Pontevedra ten que saír concentrado e mentalizado. O técnico granate destacou que, nunha situación como a do equipo, calquera encontro vólvese importante, sexa cal for o rival. "Nesta ocasión é o Xetafe, que está de último, pero nós temos que ver que vimos de dúas derrotas, que queremos volver gañar e que agora non estamos para fiarnos de ninguén", destacou Areda que engadiu que "como nos desviemos, evidentemente que imos sufrir".
A pesar da situación do equipo, o vigués destacou que "o persoal está con moitas ganas de que chegue o partido do domingo, iso é un bo sinal. Iso significa que ten ganas de xogar, de facelo ben, de gañar e de que desaparezan as pantasmas que roldan". Tanto o técnico como os xogadores deberán estar pendentes do ceo, xa que a choiva ameaza con facerse partícipe do encontro e o campo de Pasarón tende a embarrarse nos días de choiva. O adestrador do conxunto granate aclarou que este feito non lle preocupa, pero que conta con iso.
"Agora mesmo xa estamos afeitos. Convivimos con iso e sabemos que cando chega a choiva o campo sofre e hai que adaptarse a iso", asegurou Luismi que engadiu que "de momento o campo está ben. Unha vez que se empeza a pisar, o campo empeza a sufrir. Sabemos que o campo non drena ben e que coa chegada da auga sofre. A base de choiva e de pisalo ponse feito un bulleiral".
Sobre este asunto, Luismi tamén destacou que no club son conscientes destes problemas, pero que as medidas para solucionalo pasan por levantar o céspede e o momento non é o adecuado. "Co tempo buscarase unha solución. O club é consciente diso, pero todo ten o seu momento e non é agora", afirmou.
Areda mantén que non é positivo realizar grandes revolucións ou cambios drásticos xa que iso non é positivo para o equipo cambiar as ideas que se estiveron traballando con anterioridade. "Hai que ir cunha idea, ás veces enfocala cuns condicionantes e noutras ocasións con outros, pero sen volvernos tolos, xa que ao futbolista non podes volverlle tolo", asegurou.
Con respecto ao once que o técnico granate sacará mañá fronte ao Xetafe, Areda destacou que se atopan pendentes de Nacho López que, "ten unha pequena molestia nun abdutor", pero que "en principio non parece nada importante". Luismi é positivo con el xa que só sentiu unhas molestias, pero destaca que "se non está, terá que xogar outro. Hai dous xogadores por posición e hai que intentar que se un non está, dar a oportunidade ao"outro .
