Os Condes de Albarei Teucro continúa cos exames de pretemporada. Superado o ecuador da mesma, o equipo pontevedrés recibirá este sábado no Pavillón Municipal de Pontevedra ao ABC de Braga, un equipo xa coñecido polo conxunto teucrista. O bloque luso adoita ser un habitual nas pretemporadas do Teucro, xa que teñen un nivel moi similar e é un bo rival para prepararse de face ás competicións oficiais, a máis próxima, a Copa Galicia.
Tras gañar sen complicacións ao Ismai Maia o pasado martes, os Condes de Albarei Teucro chega ao encontro de hoxe con moita motivación e con ganas de sumar un novo aprobado á lista de pretemporada. Ademais, durante o día de onte, na presentación oficial do corpo técnico do equipo, que se realizou no hotel Rías Baixas de Pontevedra, Luís Montes aproveitou para mostrar a súa satisfacción co rendemento dos xogadores ata agora.
E é que segundo o adestrador teucrista, esta primeira parte da pretemporada foi superada con sensacións "moi positivas". Montes destacou o bo funcionamento do grupo e a rápida adaptación das novas fichaxes, que están moi compenetrados co resto de xogadores.
De feito, no encontro do martes, foron as fichaxes desta tempada os que non quixeron pasar desapercibidos. é o caso de Facundo Cangiani (cinco tantos) ou Guillermo Fischer, que desde que pisaron a pista non viñeron abaixo en ningún momento e foron os principais protagonistas da vitoria. O central Natan Suárez tamén realizou un papel moi destacado durante o encontro, no que anotou catro tantos. O veterano Davor Cutura (catro dianas) quixo deixar claro o seu bo estado de forma no seu retorno ás pistas do Municipal.
Ata agora, a parte física está a ser unha parte fundamental da pretemporada, algo que quixo destacar o corpo técnico durante a presentación de onte. Nesta preparación de tempada, Toño Puga está a desenvolver un papel moi importante como preparador físico.
Agora só queda pensar no encontro desta tarde e intentar sumar unha nova vitoria que permita chegar pletórico ao equipo teucrista á cita autonómica das próximas semanas. Tras o encontro de hoxe ante o ABC de Braga, os Condes de Albarei Teucro viaxará a terras lusas para enfrontarse de novo ao equipo portugués. Isto será o vindeiro martes. O sábado 25, os pontevedreses desprazaranse a León para medirse ao Ademar, dando por finalizado os partidos amigables e fixando xa a vista no primeiro encontro de liga.
