O novo Pontevedra xa súa. Logo de máis de dous meses de vacacións para a maioría, os integrantes do persoal granate que buscará o ascenso a Primeira RFEF empezaron esta mañá a pretemporada. Serán cinco semanas de preparación antes do debut ligueiro, o próximo 5 de setembro ante o Compostela. Ángel Rodríguez, o novo adestrador do PCF, planificou unha primeira semana con moita carga de traballo, con catro dobres sesións e o domingo como día de descanso. Vai ser unha pretemporada bastante intensa. Adoitan ser así as miñas pretemporadas, con sesións dobres. Imos ver como están de pernas, porque levamos moito tempo parados”, expresou esta mañá o técnico leonés durante a sesión de fotos en Pasarón, previa ao primeiro adestramento en Xeve e posterior a unhas probas médicas que non arroxaron casos positivos en covid-19, como se temía o club.
Deste xeito, a lista ao completo de futbolistas puido comezar a traballar ás ordes de Rodríguez e o seu segundo, o extécnico da filial Sergio Moreira. Entre eles hai oito canteiráns que tratarán de gañarse un posto no primeiro equipo, como anos atrás fixeron Santi Figueroa e Martín Diz. "Temos que potenciar a canteira, a base, a xente de abaixo. E non podemos facelo doutro xeito se primeiro non nos fixamos neles. Van estar un mes connosco adestrando, cada un vai mostrar as condicións que ten e en definitiva eu decidirei por uns ou outros en función tamén dos postos”, apuntou Rodríguez, que asegurou que non teñen "présa" por pechar as incorporacións para cubrir as dúas fichas sénior que o PCF aínda ten libres. "Non debemos aventurarnos a asinar xa e podernos equivocar. Son dous postos que temos que asegurar e que marcarnos como postos que lle van a dar un toque de calidade ao equipo", engadiu o primeiro adestrador do Pontevedra.
Sobre que espera do seu persoal, Ángel Rodríguez detallou que na súa primeira charla pediu que o granate sexa "un equipo moi intenso". "Imos facer adestramentos curtos e a intensidade ten que ser máxima. O tempo de descanso vai estar moi limitado, co cal o xogador ten que espremerse ao máximo. E a partir de aí, entender iso como un ADN do Pontevedra en todo o que vai ser a tempada", finalizou.
