O Número Phi chegou e bicou o santo, aínda que o traballo coa canteira caldense vén desenvolvendo desde hai algúns anos, principalmente polo gran tirón que ten a esixente modalidade do taekwondo na comarca grazas a Lua Piñeiro, unha pioneira no ámbito feminino que conta cunha traxectoria deportiva de alto nivel.
Os seus estudos para dedicarse ao ensino permitíronlle compaxinar docencia e deporte. Aínda que leva tempo impartindo cátedra aos mozos que a admiran e decidiron apuntarse a esta disciplina, non foi ata xaneiro de 2020 que puxo en funcionamento o Club Número Phi. Fíxoo xunto á súa parella, Fernando Rascado, outro referente do deporte que compartiu con ela dez anos no Centro Galego de Tecnificación Deportiva (CGTD).
Na tempada da súa estrea, a entidade da vila termal sumou varias medallas nos campionatos autonómico e nacional. "Non esperabamos estes resultados. Nin a cuarta parte. Loitamos moitísimo, especialmente desde casa polas restricións sanitarias que houbo durante tanto tempo", apunta a adestradora.
A figura é Ekaterina Rebón (ouro nacional). Segundo Lua Piñeiro "ten moita proxección, igual que Roi (tamén medallista nesa competición). Pero hai moitos outros que apuntan xeitos interesantes como Nuria e Paula. A finais de ano temos a un neno de 8 anos no Campionato de España e estamos a ver de mandar a algúns integrantes do club ao CGTD de Pontevedra".
Lua denuncia que o taekwondo "foi sempre un deporte moi machista", pero con referentes como ela as cousas van mellorando. "No noso club temos un 50% de nenos e o mesmo porcentaxe de nenas", asegura.
A mediados de agosto os compoñentes top do equipo gozarán dun campamento en Ribeira ao que acudirán adestradores de toda España.