Se hai dúas tempadas alguén lle dixese a Nando Álvarez, técnico do Monte Porreiro, que o seu equipo, o Visit Pontevedra, lograría ser o líder en solitario da Superdivisión, a máxima categoría do tenis de mesa español, non llo crería. Menos llo ía a imaxinar ao final da campaña pasada cando logrou a permanencia ao límite.
Con todo, logo de comezar moi ben a liga cunha vitoria en Madrid, o pasado fin de semana o equipo de Monteporreiro volveu lograr un histórico triunfo que lle levantou ao liderado en solitario da clasificación (con catro puntos). Fíxoo en casa ante L'Escala de Xirona por un resultado de 4-1.
Para Nando Álvarez o feito de ser líderes en solitario "é algo anecdótico", a pesar de que admite que é "bonito verse aí e xera moita ilusión, non só no equipo, se non en todo o club". Aínda así, o adestrador pontevedrés é precavido e anota que non me deteño a ver que somos primeiros, se non en que as sensacións son moi positivas. Respecto ao ano pasado temos máis experiencia e sabemos afrontar os partidos doutra forma".
De feito, o rival do pasado fin de semana presentouse en Príncipe Felipe con dous dos mellores xogadores nacionais, habituais nas categorías inferiores da selección española, Iker González e Sergi Grau, ademais do ruso Maxim Chaplygin.
Os do Monte Porreiro non se aflixiron ante o nivel dos cataláns, a pesar de que o partido estivo moi rifado. Fernández explicou que "a liga vai ser un pouquiño máis forte que a do pasado ano, pero para nós o tema da experiencia é moi importante porque sabemos ao que nos enfrontamos. Os mozos subiron o nivel e todo iso en conxunto fai que os resultados estean a ser positivos".
Ese conxunto de factores notouse no encontro. Nico Galvano foi o gran valedor da xornada ao desfacerse do mozo Sergi Grau e do ruso Maxim, demostrando unha gran velocidade de pernas e contundencia nos momentos cruciais do encontro, sobre todo ante Grau. Pola súa banda, Horacio Cifuentes venceu ao xogador ruso por un contundente 3-0 e a Iker Martínez por 3-1. Este último partido foi moi táctico tendo que empregarse a fondo o xogador do Visit. Martin Bentancor non puido darlle un punto ao seu equipo cedendo nun gran encontro ante Iker Martínez por 1-3.
En dúas xornadas de competición ligueira, o Visit Pontevedra demostrou o que vale, aínda que Nando Fernández sane que "as cousas poden vir doutro xeito". O pasado ano, o conxunto do Monte Porreiro estivo en albas xornada tras xornada, pola pouca experiencia na categoría e o gran nivel. Por iso, para o técnico e para os propios xogadores este inicio de competición é "moi positivo", porque "ter catro puntos a estas alturas, co que nos custou o ano pasado, déixanos moi contentos".
