Tres cuarto e algo. Iso foi o que aguantou o Marín Peixegalego ante o líder, un Carramimbre Valladolid ao que fixo suar a pinga gorda para levar o triunfo de A Raña.
No que parecía unha unha visita teoricamente sinxela ao pechacancelas, sufriu de xeito abondo para sacar o partido adiante e seguir no máis alto da clasificación. O Peixe foi comandando o marcador durante a práctica totalidade do choque e chegou tres arriba ao último cuarto (56-53), pero a boa gesitión do cadro valisoletano nos minutos finais (13-22 no parcial decisivo) resultou clave para encadear a quinta vitoria consecutiva e manter a vantaxe cos perseguidores.
Que ao conxunto valisoletano non lle ía a ser sinxelo saír triunfador da cancha do Peixe quedou patente desde os primeiros minutos porque o equipo de Javi Llorente saíu a morder, amparado polo estado de efervescencia no que comezaron Saunder e Shaquille Jamal. Se enchufó a afección local (20-15).
O escenario favorable serviu para reafirmar a aposta do conxunto marinense, que foi capaz de atopar ese xogo coral que en tantas ocasións botou en falta. Jacobo Díaz, Niang e Mazaira ampliaron a renda ata o 27-17 (min. 13), segundo momento crítico que requiriu a lóxica reacción de Hugo López. Aí ao Peixegalego empezaron a brotarlle os problemas. Estaba claro que se conseguise manter ese nivel de xogo non estaría onde está e a realidade do equipo de Marín é que lle falta continuidade.
Resistiu a pesar de todo o Peixegalego tras o descanso, un punto crítico no que adoita tirar os partidos por desconectarse sen previo aviso tras mostrar ese bo xogo durante longos períodos. Taiwo e Saunders mantiveron o pulso a un cadro valisoletano. Pero o primeiro tívose que ir por un golpe no rostro e aí aproveitou o Valladolid para porse por diante (52-53) e apertar os dentes para facer que o Marín fincase o xeonllo. Deste xeito, o Peixe demostrou que pode competir e brillou, a pesar de non gañar.
Javi Llorente, adestrador Marín Peixegalego: "Se algo demostramos varios cursos é que non se nos pode dar por mortos"
O adestrador do Peixegalego afronta a derrota vendo o punto favorable deste encontro. Para el a mala serie do conxunto marinense "era máis unha cuestión anímica". Llorente asegura que ese problema se resolveu e que "xa hai xogadores aos que recuperamos e que volveron ao seu nivel. Recuperamos esa agresividade, sobre todo ese nivel físico que nos fai competir". Pero iso non foi suficiente ante un Valladolid que o técnico cualifica como "un equipo moi ben adestrado e moi ben traballado que sacou moitos partidos ao final porque non cometen erros. E nós, nese sentido, cometemos moitos máis que eles".
Aínda que cre que o traballo en equipo foi fundamental en tamén tivo palabras para Niang, a nova fichaxe: "Achéganos un punto diferente en ataque, máis opcións que non tiñamos ". No Peixe tamén son conscientes dos seus erros ante o Valladolid, sobre os que Llorente di que "fomos capaces de facer moitas cousas ben, pero cun equipo como este se regalas os dous últimos minutos do segundo cuarto e chegas aos últimos cinco minutos e son capaces de anotarche oito puntos cómodos debaixo do aro sen ser duros, pois entón é imposible gañar partidos".
Aínda así, a técnico sentenza que "se algo demostramos varios cursos é que non se nos pode dar por mortos".
