O Condes de Albarei Teucro comezou a pretemporada con bo pé. A pesar de perder o primeiro encontro amigable fronte ó Frigoríficos del Morrazo, os pupilos de Luís Montes souberon resarcirse nos partidos posteriores.
O conxunto azul deste ano preséntase totalmente renovado, pero ese feito non está a ser un problema para mostrarse como un equipo compacto, aínda que aínda queda moito que traballar antes de dar comezo á competición ligueira o próximo 14 de setembro.
O Teucro xa ten en mente gañar o primeiro título da tempada grazas á súa participación na Copa Galicia, na que conseguiu o pase a cuartos de final logo de gañar ao Balonmán Cañiza por un avultado 26-35. O seguinte encontro copeiro é un dos máis importantes (ata o momento) da pretemporada para o Teucro, aínda que aínda non se coñece a data nin o horario no que se disputará.
O Teucro xa ten en mente gañar a Copa Galicia
Co bo sabor de boca da Copa Galicia, o pasado fin de semana, o Condes de Albarei Teucro conseguiu quedar co I Torneo Internacional Xacobeo tras gañar ao Ismai Maia e ao Xiria de Carballo, na que foi a presentación do equipo á afección teucrista, xa que o torneo tivo lugar no Municipal. O próximo encontro amigable, sen contar os correspondentes duelos de Copa, será unha semana antes do comezo da liga contra o Oviedo.
A pasada pretemporada, correspondente á campaña 2018-2019, o Condes de Albarei Teucro terminou a fase de preparación con tan só unha derrota, que foi fronte ao Ademar de León, mentres que conquistou a Copa Galicia tras gañar na final ao Frigoríficos del Morrazo. Por iso, o obxectivo do equipo este ano é intentar repetir o conseguido o anterior. Aínda así, a estas alturas da pretemporada, Luís Montes xa contaba con todos os xogadores, mentres que este curso aínda non puideron adestrar co plantel ao completo, xa que falta por chegar a Pontevedra o serbio Nikola Perovic. O xogador tivo problemas co transfer e tanto o club como o corpo técnico esperan que se incorpore esta semana. Outro xogador que comezou tarde os adestramentos foi o gardameta arxentino Federico Wermbter, pero xa estivo presente nos últimos tres encontros.
Sen dúbida preséntase unha tempada moi ilusionante para o Condes de Albarei Teucro, cun obxectivo ambicioso (tendo en conta a dificultade da categoría este ano), que é o regreso á liga Asobal.
