O marinense Jean Marie Okutu foi un dos protagonistas de excepción nos Campionatos de España de Atletismo ao aire libre e na súa última xornada celebrados na localidade madrileña de Xetafe. O saltador do FC Barcelona acaparou os focos por partida dobre, grazas a un fantástico cuarto salto de 8 metros e 1 centímetro, que o propulsou á primeira posición, por encima do 7.78 de Francisco Cobián (At. Xixonés) e o 7.77 de Héctor Santos (FC Barcelona).
O intento de Jean Marie Okutu foi a mellor marca nacional da tempada, superando o 7.97 de Eusebio Cáceres e o 7.95 da marca mínima continental. Este salto outórgalle ao atleta marinense un posto nos Europeos de Berlín do mes que vén. A proba non llas prometía felices para o saltador do club culé, que só puido alcanzar a cuarta posición (7.40) co seu primeiro salto. Tras dous nulos, no segundo e terceiro intento, chegou o momento da verdade e non defraudou, o cuarto salto. Como colofón á gran actuación, Okutu xa non precisou do seu quinto e sexto intento, valéndose dese gran 8.01 que decantou a competición.
Desta forma e logrando o seu sexto ouro nacional ao aire libre (o undécimo en total), o atleta marinense, que tamén mellora a súa marca persoal de 2017 (7.92), resárcese do seu sexto posto nos Xogos do Mediterráneo, nos que conseguiu unha marca final de 7.78.
Moi feliz pola vitoria. Era o último día para facer a mínima e tras un mes duro saíu, afirmou Okutu
TRIPLO SALTO. Outra das protagonista foi a ribeirense Ana Peleteiro que segue en estado de graza. Cumpriu con todas as expectativas no seu favor e desfíxose da presión logrando o ouro nacional no seu primeiro intento, cunha marca de 14 metros e 39 centímetros. Tras a competición, a atleta ribeirense declarou que "superamos unha mala serie. Estaba estancada con saltos de 14.20 e 14.30, pero traballamos moito e notouse hoxe (por este domingo)".
O seu mellor salto foi de 14.55, máis que suficiente para facerse co primeiro posto. Ningunha das súas rivais logrou pasar dos 14 metros, pero ela superou esa distancia ata en tres ocasións. Só a madrileña Patricia Sarrapio, cun salto de 13.91, puido seguir o seu ronsel e facerse coa prata.
Peleteiro, que se adestra co exsaltador cubano Iván Pedroso, xa conseguiu en xaneiro a marca mínima para acudir a Berlín. A atleta do CA Adidas mostrou o seu excelente estado de forma —a primeira vez desde o ano pasado que compite sen molestias— con este novo título nacional ao aire libre, que xa lograra en 2015 e 2017.
O seu dominio da competición está a ser palpable durante todo o ano, xa que superou esa mínima europea, situada en 13.90, ata en oito ocasións no lapso de seis meses. Tras o bronce mundial logrado en Birmingham en marzo, a saltadora é unha das candidatas a medalla no Europeo. "Soño co ouro europeo, pero é un campionato e haberá atletas boísimas. Síntome con moita ilusión e con ganas de facelo o mellor posible", admitiu Peleteiro.
Solange Pereira, terceira
A atleta soriana entrou en meta a oito décimas de diferenza da segunda, mentres que Solange Pereira quedou cortada e cruzou a liña a cinco segundos das de cabeza, cun tempo final de 4.16.30. Solange Pereira, do mesmo xeito que Peleteiro, logrou clasificarse xa para os Europeos de Berlín antes desta cita, superando nun segundo e oito milésimas (4.08.52) a mínima. Logrouna no meeting de Huelva do pasado mes, e nestes nacionais, tras obter o mellor tempo na semifinal, logrou o bronce nacional con folgura.
A rivalidade con María Pérez, a súa compañeira de equipo do València Esports, é palpable desde fai un tempo. Foi precisamente a atleta soriana quen privou a Solange Pereira da medalla nos pasados Xogos do Mediterráneo. Ambas acudirán a Berlín coa bitola de favoritas na proba reina do medio fondo.
