O Pontevedra non atopou nesta segunda volta o acerto dos seus dianteiros. Á marxe do punta do filial Rivera, nin Javi Pazos nin Mikel Arruabarrena viron porta desde o pasado 6 de xaneiro. Con todo, esta traba non foi obstáculo para impedir que o conxunto granate sumara 21 puntos desde o ecuador e siga loitando por meterse no play-off. Porque os goles do PCF veñen desde atrás.
O conxunto dirixido por Luismi Areda anotou 15 goles nos 13 partidos da segunda volta. A cifra é baixa, pero non tanto se se ten en conta que doce deses tantos foron obra de defensas ou centrocampistas.
Con Mikel Arruabarrena e Javi Pazos ancorados en sete e seis goles, respectivamente, desde o final da primeira volta, os extremos Álex González e Álvaro Bustos, xunto co mediocentro Borja Domínguez, son os máximos artilleiros do bloque da Boa Vila desde mediados de xaneiro, cando arrincou o tramo final de competición. Todos eles anotaron dúas dianas.
González marcou o 1-0 contra o Burgos (posteriormente 1-1) e anotou o 2-0 ante o Fuenlabrada (acabou 3-0). É dicir, os seus goles valeron un punto. Mentres, as dúas fichaxes de inverno tamén achegaron na faceta goleadora. Bustos marcou o 2-1 contra o Ínter (finalmente 2-2) e anotou tamén o 2-1 da pasada fin de semana contra o Sanse, co que o seu acerto de cara á porta viuse materializado en tres puntos. Pola súa banda, Borja Domínguez marcou o 1-0 contra o Celta B (un tanto que rompeu o empate e engadiu dous puntos máis ao botín do PCF) e sentenciou co 3-1 definitivo o choque do último domingo.
Ademais, outros sete xogadores granates viron porta. Deles, catro son centrocampistas: Romay, Pedro Vázquez, Kevin Presa e Berrocal. O primeiro deles empatou o choque contra o Ínter de Madrid. Ademais, o mediapunta de Malpica tamén provocou o tanto en propia porta que se marcou o Guijuelo. Pola súa banda, Pedro Vázquez anotou o primeiro gol contra o Fuenlabra (3-0). Kevin Presa e Berrocal marcaron os goles para sentenciar os choques contra o citado Fuenlabrada e o Navalcarnero, respectivamente.
Mentres, os defensas tamén contribuíron en ataque, como demostran os casos de Alberto Campillo e David Castro, que anotaron un tanto ao longo do 2019. Ambos os futbolistas, ademais, anotaron a balón parado e o seu tanto serviu para abrir o marcador nos triunfos ante o Navalcarnero (2-0) e o Deportivo Fabril (1-0).
Deste xeito, Arruabarrena e Pazos seguen sendo os máximos goleadores do equipo, pero tanto Romay como Kevin Presa suman catro e colócanse por detrás.
Dos oito primeiros clasificados, o Pontevedra é o segundo que menos tantos anota (39), só por diante do Guijuelo (30). A nivel defensivo, hai cinco conxuntos con mellores números: Fuenlabrada, Ponferradina, Atlético B, Cultural e Guijuelo.
