A pandemia está a deixar escenas insospeitadas no mundo do deporte. O CB Arxil foi protagonista este fin de semana: as pupilas de Maite Méndez disputaron dous partidos en apenas 16 horas… e ambos se saldaron con derrota. Logo de morrer na beira ante o Celta, o equipo pontevedrés cedeu onte ante o Ibaizabal (55-65), que viña de gañar en Santiago de Compostela o sábado. O conxunto biscaíño mostrouse máis enteiro no último cuarto, no que abriu unha brecha que resultou imposible de levantar. A escuadra verde non logrou a súa terceira vitoria consecutiva en casa e permanece na parte baixa da clasificación.
A carga de encontros cobrouse a súa primeira vítima no minuto inicial, cando María Lago se viu obrigada a abandonar o parqué con evidentes síntomas de dor. O Arxil repúxose ao pau e, liderado por unha xenial Sara Castro, asumiu pequenas vantaxes no arranque (7-5, min. 5). Noelia Masiá impúxose no rebote, pero Ibaizabal conseguiu reverter o marcador grazas á súa boa lectura defensiva. O equipo pontevedrés atopou dificultades para anotar. A constante ameaza exterior de Tulonen, que obrigou a Forster a abandonar a pintura, supuña outro problema para as pupilas de Méndez. O conxunto vasco foise por diante ao segundo cuarto (13-15).
O cansazo parecía non pesar entre as visitantes, moi intensas en defensa e autoras de múltiples roubos. Ibaizabal asumiu a súa máxima renda cun triplo de Koskimies, experta no pick and pop (15-20, min. 13). O Arxil sufría, incapaz de dominar o rebote defensivo a pesar da presenza de Forster e Ndoye sobre a pista. Nos últimos compases do primeiro tempo, a escuadra lerezana reaccionou (parcial de 14-7) e, cun triplo sobre a bucina de Natalia López, conseguiu chegar con vantaxe ao descanso (29-27).
O equipo local, como no segundo cuarto, non entrou ben ao duelo tras o paso polos vestiarios. A presión a toda pista do seu rival incomodoulle e Ibaizabal, con triplos de Canedo e Koskimies, chegou a gañar por seis, (39-45, min. 28).
TIRÓNS. O Arxil reaccionou de xeito inmediato para volver comprimir o marcador (44-45, min. 30). A igualdade era total ao chegar ao último asalto. Unha vez máis, o conxunto biscaíño empezou mellor. Un parcial de 0-4 estirou o luminoso ata o 44-49, neutralizado por un triplo da omnipresente Sara Castro. Outro 0-5 situou a Ibaizabal con +7 (47-54, min. 34), de novo con Koskimies sometendo ao Arxil desde o triplo. Coma se dun ioió se tratase, a escuadra local volveu achegarse (52-54, min. 35) e dispuxo de varias bólas para igualar ou porse por diante, pero fallou e as visitantes non perdoaron.
A distancia, tras unha técnica sinalada a Maite Méndez, converteuse en insalvable a falta de dous minutos (52-61). A derrota no CGTD culminou un fin de semana negro para o Arxil, ao que xa comezan a preocuparlle os resultados, que o manteñen en zona de perigo.
"É surrealista: dous partidos en fin de semana non conveñen a ninguén"
A adestradora do CB Arxil, Maite Méndez, lamentou a derrota do seu equipo ante Ibaizabal, a segunda en dous días: "O sábado xogamos un partido moi duro contra o Celta, que nos esixiu ao máximo. En Vigo estivemos vivas ata o final. En cambio, Ibaizabal disputou un encontro moito máis relaxado contra Rosalía. Esa puido ser unha das claves do resultado".
Apenas houbo 16 horas de diferenza entre o final do choque en Navia e o inicio do duelo do domingo, unha situación "surrealista" para a preparadora: "é moi duro. Isto non pode pasar. Non me cansarei de insistir en que a tempada xa ten bastantes compoñentes de lesións musculares como para que lle engadamos este tipo de cousas. Sabemos que estamos a pasar unha situación moi fodida, pero o equipo sufriu catro adiamentos na primeira volta. Non é moi normal. Estes compactos de fin de semana non fan ben a ninguén".
O cansazo pesou entre as súas pupilas, menos enteiras que o cadro biscaíño no tramo final: "En ocasións fallamos na execución. Cando estabamos a seis puntos, saíronsenos dous balóns do aro. Tampouco nos acompañou moito a sorte".
Méndez valorou a lesión de María Lago no primeiro minuto de xogo: "é muscular, pero non sabemos de que dimensión ata que fagamos probas".
65- GDKO Ibaizabal: Arrien, Cotano (12), Molina (14), Tulonen (11) e Koskimies (20). Tamén xogaron: Laura Marcos (7), Portilla, Iruskieta e Aizpurua (1).
Árbitros: Abalo Buceta e Esteban Domínguez (Colexio galego). Sen eliminadas.
Incidencias: Pavillón do CGTD. 30 espectadores. Partido correspondente á quinta xornada.
