Pablo Dapena deu este sábado por finalizada a tempada cun triunfo no Challenge de Peguera (Mallorca). O triatleta pontevedrés impúxose cun tempo de tres horas, 54 minutos e oito segundos nunha cita que tiveron que abandonar tanto Emilio Aguayo como Fernando Alarza.
Dapena era un dos grandes favoritos desta proba e sentenciou o triunfo na carreira a pé. De feito, saíu da auga nun grupo de cabeza xunto a Fernando Alarza, Carlos López, Jordi García e Daniel Baekkegärd. Un incidente marcou o desenvolvemento da carreira, xa que o talaverano Alarza sufrira unha caída na entrada á auga que lle provocou unha lesión nun dedo e fíxolle abandonar aos 15 quilómetros do traxecto de ciclismo.
O danés Baekkegärd separouse do resto de triatletas e conseguiu unha vantaxe de preto de dous minutos. Mentres tanto, Pablo Dapena mantívose cerca do suízo Manuel Küng e do esloveno Jaroslav Kovacic. Con todo, o pontevedrés gardábase un as para a carreira a pé: era o máis forte nese sector e demostrouno en volta e media. Pablo tomou o liderado a falta de 16 quilómetros e terminou impóndose de forma contundente. A segunda praza foi para Manuel Küng, que chegou dous minutos e un segundo despois do pontevedrés, mentres que o seu gran rival no ranking mundial o Challenge, o esloveno Jaroslav Kovasic, foi terceiro a seis minutos e dez segundos.
RANKING. Agora mesmo, Pablo Dapena está empatado a 1.550 puntos con Sebastian Kienle. O alemán está inscrito no Challenge de Sardeña da próxima semana, pero podería non chegar á competición debido a unha lesión. Polo tanto, de non competir, a clasificación non se movería e o triunfo sería para os dous deportistas, repartíndose o premio económico.
Podería darse que Kienle competise en Sardeña e se consegue puntuar, sería o vencedor do ranking Challenge Family, quedando Pablo Dapena en segunda posición. á espera do que faga o alemán, o pontevedrés deu por finalizada unha tempada espectacular na que se proclamou campión do Mundo de longa distancia en Dinamarca e subcampión de Europa no Challenge de Madrid.
Dapena deixou ao carón o Campionato de España celebrado en Pontevedra a finais de agosto para centrarse na proba continental. A aposta saíulle ben, sobre todo tendo en conta que lle valeu para seguir pelexando polo ranking. Tras un curso sensacional, agora chega un merecido descanso para Dapena, mentres que a cidade do Lérez xa se prepara ao mesmo tempo para a gran cita de 2019: o Festival ITU Multisport. Aí espérase a participación de Pablo, pero tamén de Javi Gómez Noya, que ademais este sábado reapareceu tras o Ironman de Kona no Santander Triathlon Series en Madrid.
