Carlos Pouso: "Pecamos de pardillos"

O adestrador do Pontevedra, Carlos Pouso, falou con franqueza do que lle faltou ao seu equipo para sacar o partido adiante: "Na primeira parte faltounos un pouco de decisión, de apertar arriba, cando os tiñamos tocados e na segunda fixéronnos dous goles nun plis plas e xa se xogou ao que eles querían".

"Os meus xogadores quéixanse de que no segundo e o terceiro gol hai dúas faltas previas, pero o que hai que facer é seguir a xogada e logo xa pitarán. Pecamos de pardillos e non hai máis nada que dicir. Pilláronnos en accións moi puntuais, non descolocados, pero si protestando ou pensando que o árbitro vai pitar. Hai que ser máis enérxico nestas situacións. é un contrario de moita calidade e por iso vai como vai", comentou o técnico vasco.

O preparador do conxunto lerezano insistiu na importancia que ten que o Baleares non consiga porse por diante no marcador: "Eles souberon remontar, entender o fútbol e facer o que hai que facer. O Baleares é un equipo que sabe facer que sucedan poucas cousas, por iso hai que evitar que se che poña por diante".

Carlos Pouso recoñeceu que a dinámica pode empezar a ser unha laxa para o vestiario: "Unha das razóns de que cando encaixas un gol cáiaseche o mundo encima sexa esa". "É labor meu saber levantar ao equipo e dicirlles que non ten que ser así. Debemos analizar ao equipo que temos en fronte e non cometer ese tipo de erros porque ás veces non é que gañe o outro equipo, senón que favoreces que remonten", completou o vasco.

MANIX MANDIOLA: "MELLORAMOS A Nivel DE ACERTO TRAS O DESCANSO"

O adestrador do líder da categoría analizou a diferenza de acerto do seu equipo entre a primeira e a segunda parte: "Na segunda parte houbo outro Atlético Baleares en canto a acerto, nada máis. Creo que fixemos unha primeira parte boísima, xerando ocasións que non materializamos. Eles a primeira que tiveron metérona e despois houbo unha segunda nun momento no que o gol nos deixaron tocados, encima despois fallamos o penalti. Pero o equipo ten fe no que fai e ten confianza porque os números aválannos".

Mandiola pediulle aos seus xogadores que seguisen igual no segundo período, a remontada era cuestión de mellorar o acerto: "No descanso o que se comentou é que había que seguir facendo as mesmas cousas e intentar ter máis acerto. Coa mesma posta en escena, fixemos dúas chegadas e dous goles para darlle a volta ao partido. A partir de aí concedemos moi pouquiño e ata tivemos algunha ocasión máis". Tanto que ao final o seu equipo anotou o terceiro.