O vindeiro domingo, a partir das 12.00 horas, en Pontevedra, o Marín Peixegalego comeza a tempada de Primeira Nacional contra o Arxil Mafari. O conxunto marinense afronta unha campaña que marca o cambio de dirección adoptado polo club, que deu un xiro de 180 graos para apostar polo baloncesto feminino.
O cadro adestrado por Pedro Fernández intentará ser competitivo desde o inicio. Un colectivo moi novo, con moita versatilidade e chamado a xogar a toda velocidade intentará pór contra as cordas aos favoritos do sector galego do grupo 1.
Logo de meses de incerteza, os clubs aínda non dispuñan onte dos protocolos antiCovid19 que han de empregar. A previsión é a de que as xogadoras deban realizar probas e non saltar á cancha con máscara.
O calendario reformulouse e a estrutura da competición, tamén. O que nun principio ía ser un grupo con galegas e rivais doutras federacións autonómicas, agora vese transformado en dúas fases. Na primeira, mediranse os conxuntos da mesma demarcacion territorial nunha liguiña a dobre volta, contra o mesmo rival en dous fins de semana seguidos.
RIVAIS. Os adversarios do Peixe serán o propio Arxil Mafari (debut e segunda xornada de derbis), o Carmelitas de Ourense, claro favorito, o Peleteiro de Santiago e o Seis do Nadal de Vigo.
O equipo de Marín está formado por Carmen
"Adestraron como bestas", destaca o técnico antes do comezo do curso. Sabe que será un ano de aprendizaxe, para ir madurando na categoría. "A xogadora de máis idade ten 21 ou 22 anos", explica o preparador vigués, que non descarta algunha incorporación máis coa competición iniciada, pero cre nas pupilas de que dispón agora. "Van ter que dar un paso adiante e asumir responsabilidades".
O conxunto marinense proponse realizar un xogo intenso e dinámico. "Intentaremos practicar un baloncesto moderno, no que todas as xogadoras poidan actuar dentro ou fóra da zona en función das vantaxes físicas, técnicas ou tácticas de que dispoñamos", comenta. As limitacións de centímetros do colectivo ditarán o estilo.
"Imos xogar con velocidade, con catro abertas e unha xogadora interior. Temos dúas bases eléctricas, que nos deben axudar. Hai que correr e para iso imos apertar moito en defensa", comenta o responsable do banco do Peixe. Defender e correr, intensidade e velocidade para converter a carencia de centímetros e anos en virtude.