Un pivote que sexa referencia no xogo ofensivo do equipo e un combo, con capacidade para dirixir e anotar: esas son as necesidades que o Marín Peixegalego intenta saciar no mercado para pechar o seu persoal da tempada 2019-20.
O cadro marinense dispón de oito homes no colectivo que afrontará a segunda tempada en LEB Ouro na historia da entidade. Os responsables deportivos do club esperan poder elaborar un conxunto formado por dez ou once xogadores (o tope de licenzas é de 12), en función das opcións que ofreza o mercado e sempre dentro das posibilidades económicas do club de Marín, que é o que manexa o orzamento máis limitado da máxima competición FEB.
O Peixe afronta unha práctica reestruturación do colectivo que logrou o salto de categoría. A pesar do interese por renovar a unha gran parte dos xogadores que o levaron a Ouro, a aparición doutros proxectos máis zumentos para os seus baloncestistas acabaron frustrando os seus intereses. Así, Vashil Fernández manexa propostas máis atractivas para el e rexeitou a oferta de renovación que realizou a entidade marinense.
Ademais, un dos xogadores de referencia do equipo nas últimas tres tempadas, Jorge Romero, atopou destino no estranxeiro, cunha suculenta oferta á que o Peixegalego non se podía aproximar nin de lonxe.
O club de Marín tampouco podía competir co ambicioso proxecto deportivo e económico que manexa o Xirona, club detrás do que se atopa Marc Gasol, e que ten como obxectivo ascender a ACB nas próximas campañas. A contratación de Gerard Sevillano, o home máis regular do Peixegalego no tramo final do curso pasado, ou a fichaxe da base do Monbús Obradoiro Albert Sàbat son proba da capacidade adquisitiva da escuadra xerundense.
HUMILDE. O Peixegalego partirá en LEB Ouro co orzamento máis modesto de todos os participantes. O club só foi capaz de reter a Juanchi Orellano e a Taiwo Badmus. Ata o momento, incorporou a seis xogadores: Carlos Noguerol (base), Joel Hernández (escolta), Rodrigo Seoane (beirado), Alex Mazaira (ala-pivote), Jacobo Díaz (ala-pivote) e Shaquille Doorson (pivote).
A aposta do club é
