O piragüismo pontevedrés foi protagonista da primeira Copa do Mundo disputada en Racice (República Checa) na que os lerezanos Adrián Sieiro e Carolina García e os cangueses Teresa Portela e Rodrigo Germade subiron ao podio. Así mesmo deixou un resultado esperanzador a través de Antía Jácome, que foi sétima logo duns últimos meses condicionados por culpa dunha lesión.
Carolina García e Teresa Portela protagonizaron unha das grandes sorpresas da delegación española ao lograr co K-4 xunto a Sara Ouzande e Laia Pelachs a medalla de prata na proba de 500 metros. Dese xeito clasificáronse para o Mundial do próximo mes de agosto en Canadá.
Carolina García, que actualmente defende ao Náutico Sevilla, recoñeceu que formar parte do K-4 é un privilexio. "Xa só competir con elas nunha competición internacional é incrible".
Outra das grandes noticias que deixa esta Copa do Mundo é a segunda praza conseguida por Adrián Sieiro, xunto ao balear Joan Antoni Moreno, no C-2 500 metros onde protagonizaron un espectacular duelo polo triunfo coa outra embarcación española (Os sevillanos Pablo Martínez e Cayetano García).
Na final de C-1 200 metros, a olímpica Antía Jácome finalizou en sétima praza. O resultado, aínda que insuficiente para obter billete para o Mundial é moi esperanzador xa que hai tan só tres meses a padeeira da Cidade de Pontevedra sufría dunha grave lesión na costela que lle impedía adestrar e que chegou a pór en dúbida a súa participación nesta tempada 2022.
En febreiro recoñecía que me empezaba a doer o corpo e non sabía que era. Fun ao médico e diagnosticáronme unha fisura nas costelas", que estivo a piques de deixala sen nada este ano, pero a padeeira do EPCP recuperouse para o selectivo e nesta Copa do Mundo demostrou ir por bo camiño.
A debutante pontevedresa Claudia Couto asinou unha impresionante cuarta praza no C-1 500 na súa primeira final en competición internacional, deixando clara a súa fame de logros no futuro e dando mostra de que pelexará por obxectivos maiores no futuro.
A outra medalla pontevedresa conseguiuna o cangués Rodrigo Germade co K-4 que liderou de principio a fin a final na que bateu á selección alemá, vixente campioa olímpica.
A selección española de piragüismo terminou na cabeza do medalleiro esta Copa do Mundo, con nove metais, tres de ouro, catro pratas e dous bronces.
O equipo español precedeu na clasificación final a China (3-2-2), Alemaña (3-2-1), Ucraína (3-2-1), Polonia (2-2-2) e Cuba (2-2-1).
Na última xornada conseguiu catro novos podios. Begoña Lazcano colgouse o ouro en K1 5000, proba na que Miriam Veiga foi terceira tras a italiana Susanna Cicali; e lograron sendas pratas María Corbera en C1 5000 e Isabel Contreras en K1 1000.
O tamén medallista olímpico Marcus Walz, tan só media hora logo de gañar o ouro co K4, logrou o bronce en K1 500 tras o xermano Jakob Thordsen e o danés Magnus Sibbersen.
O próximo fin de semana disputarase a segunda proba da Copa do Mundo
