O Poio Pescamar espera regresar á pista o martes

O persoal e o corpo técnico do Poio Pescamar, confinados desde o martes 12 de xaneiro por un brote de coronavirus, someterase desde este venres e ata o vindeiro luns a unha nova rolda de probas PCR para confirmar a desaparición do virus do organismo das contaxiadas e a non aparición de máis casos. No inicio da pasada semana, a realización de test de antíxenos puxo de manifesto tres positivos. Un número que posteriormente se incrementou tras o cribado con PCR.

Deste xeito, tras dez días en réxime de confinamento, as integrantes do persoal e o corpo técnico pasarán as probas PCR. Todas as persoas afectadas por coronavirus están, desde hai días, sen síntomas.

De ofrecer as probas un resultado positivo, o Poio Pescamar podería regresar aos adestramentos entre o martes e o mércores. De feito, a intención do club é que as xogadoras poidan regresar ás pistas antes do xoves da semana que vén, xa que se as probas diagnósticas son negativas, terán que disputar o encontro ante o Cidade das Burgas o sábado día 30.

Este xoves, o club recibiu a confirmación do adiamento do duelo que este fin de semana medíalles ante o Roldán. Co choque aprazado contra o equipo murciano, o Pescamar xa suma dous partidos pendentes de data, xa que o pasado sábado tampouco puido medirse ao Club Deportivo Leganés, no choque que ía abrir a segunda volta desta primeira fase.