O Pontevedra podería reforzarse con materia prima brasileira. O club granate estuda incorporar a algún futbolista do Galicia Esporte Clube de Bahía á súa estrutura deportiva. A entidade granate mantén un convenio de colaboración coa institución brasileira, que lle permite acceder aos xogadores con máis talento e abrirlles a porta do balompé europeo.
O pasado mes de abril, o responsable da área deportiva do Pontevedra, Roberto Feáns, e a presidenta da entidade, Lupe Murillo, estiveron nas instalacións do club brasileiro para coñecer de primeira man o seu funcionamento e intercambiar información cos responsables do Galicia.
A intención do Pontevedra é dispor dos mellores mozos do club brasileiro para reforzar o seu primeiro equipo ou alternar co filial que, tras lograr o ascenso, a próxima campaña militará en Rexional Preferente.
A presenza de deportistas cariocas no club granate non é unha novidade. O primeiro equipo pontevedrés estivo a piques de facerse cos servizos dun defensor daquel país hai dúas quendas de mercado, pero finalmente optou por contratar a Darío Flores.
BRASILEIROS. Nesta década, Ultramar tivo menos presencia nos persoais granates, xa que a situación económica do fútbol en xeral e do Pontevedra en particular complicaban a adquisición de deportistas foráneos.
Na segunda metade do primeiro decenio do século, con todo, a aparición de brasileiros no bloque de Pasarón foi recorrente. Aos tres curmáns, Charles, Yuri e Igor de Souza, uníronse algúns outros compatriotas en diferentes tempadas, como Tiago Belmonte, Humberto Soares, Maicon Junior Baggio ou o tristemente falecido Filipe Machado.
Un dos primeiros xogadores estranxeiros que brillaron no Pontevedra da época moderna e tamén un dos máis rendibles desde un punto de vista económico para a entidade foi Mauricio, que en 1990 foi traspasado ao Castelló, Os 78.000 euros que ingresou o PCF pola súa venda supuxeron un gran alivio para as súas arcas.