Pontevedra albergará este fin de semana o Campionato de España de Apnea Indoor, que contará coa participación de 39 deportistas —45 persoas en total se se contan os capitáns— chegados de nove comunidades diferentes.
O campionato arrincará este venres na piscina do CGTD co preparatorio, e a competición continuará sábado e domingo ao longo de toda a fin de semana
O evento foi presentado este xoves coa presenza do tenente de alcalde e edil de Deportes, Tino Fernández; o presidente da Fegas, Javier Núñez Barreiras; o delegado de Apnea da Federación, Héctor Costa; o responsable da organización do campionato, Diego Calviño; e o director do CGTD, Jesús López.
"A pesar da incerteza, puxémonos ao choio a finais do ano pasado co obxectivo de que se puidese celebrar antes dos campionatos internacionais e, aínda que este virus non nos deu a tregua precisa para que así fose, a participación de deportistas de altísimo nivel neste Campionato de España de Apnea será moito máis alta do esperado inicialmente", afirmou o delegado de Apnea da Fegas.
Pola súa banda, o responsable da organización asegurou ter "grandes esperanzas" de que se poidan ver boas marcas, incluso en apnea estática, onde "a marca de España está en 9 minutos e 36 segundos e o de Galicia en algo máis de seis minutos".