O Centro Galego de Tecnificación Deportiva é un lugar de referencia en Galicia para os nosos atletas de alto rendemento. Tendo en conta o nivel das instalacións e a cidade na que se atopa, é un lugar ao que xa tamén atletas internacionais de primeiro nivel chegan para prepararse para grandes eventos como son os Xogos Olímpicos de Tokio.
Frank Casañas (A Habana, 1978), olímpico en cinco ocasións, agora adestra a dous lanzadores de disco que se dirixen xa á capital xaponesa no CGTD. Desde hai tres anos, Mauricio Ortega (Colombia) e Juan Caicedo (Ecuador) adestran xunto á lenda cubana de disco.
COLOMBIA. Mauricio Ortega leva desde os 17 anos participando en competicións internacionais. Desde que quedou fóra dos Xogos Olímpicos de Río de Janeiro en 2016, aínda sendo finalista o ano anterior no Mundial de China, non para de crecer co disco en man. Máis tarde, Ortega conseguiu o ouro nos Xogos Centroamericanos e do Caribe de Barranquilla en 2018 cunha excepcional marca de 66.30 metros.
Frank Casañas: "O obxectivo é meterse na final, entón terán boas aspiracións de meterse entre os tres primeiros"
Este campionato fíxolle crer que podía ser referencia en lanzamento de disco. E conseguiuno desde que en 2020 realizase o segundo mellor lanzamento de todo o ano, 70.29 metros. Esta marca é marca suramericano na actualidade. "Ten boas aspiracións para meterse entre os tres primeiros", comenta Casañas, que o adestra desde hai cinco anos. Mauricio Ortega vai a Tokio coa mirada posta nas medallas, está na elite e sábeo, como sabe que llo debe á súa preparación con Frank. Adestrador e pupilo xa están de camiño á capital xaponesa coa delegación colombiana.
Unha delegación colombiana que desde o 11 de xullo ten en Pontevedra a dous das súas atletas femininas: Evelin Yazmin Aguilar (heptatlón) e María Lucelly Murillo (lanzadora de xavelina). Quedarán ata o día 26 co seu adestrador Mauricio Hernández, que comenta que escolleron Pontevedra polo seu clima similar ao de Tokio e para aclimatarse tamén ao uso horario progresivamente.
ECUADOR. Doutra banda, a Federación Ecuatoriana de Atletismo mantén a Juan Caicedo adestrando no CGTD desde o 2018. Ese ano, o discóbolo instalouse con Frank e Mauro en Pontevedra.
Juan Caicedo: "Teño a responsabilidade de marcar o camiño deste deporte en Ecuador e isto motívame"
Tres anos despois Juan está nun das súas mellores tempadas, tras 16 anos conseguiu meterse nuns JJOO. E isto é historia para Ecuador, que nunca antes tivera un discóbolo referente nunhas olimpíadas. Caicedo foi o primeiro: "Cando te pos a pensar son máis de 130 anos de JJOO, é moi motivante porque teño a responsabilidade de marcar o camiño do meu deporte en Ecuador", reflexiona o xa lanzador olímpico.
Caicedo fixo a marca mínima o ano pasado, pero pola pandemia o prazo xa se pechou. Aínda así, puido conseguila o pasado 23 de xuño en Portugal cunha marca de 66.35 metros.
Ata esa data o seu obxectivo era conseguir ese posto tan soñado para Tokio e desde entón está totalmente enfocado nos xogos. Estes meses de adestramento devolvéronlle á súa forma, fixéronlle "sentirse forte" outra vez. Durante o parón provocado pola Covid o ano pasado, Caicedo seguía adestrando desde a súa residencia en Pontevedra. Non lle permitían volver a casa coa súa familia. Non poder adestrar con normalidade nin estar á beira dos seus fíxolle madeixa psicoloxicamente, pero entendeu que a súa actitude tiña que ser a de achegar á sociedade e non encerrarse en si mesmo: "Nós, ao ser referentes sociais, tiñamos que dar á xente a mensaxe de como coidarse", declara o ecuatoriano.
Un ano despois enfróntase aos seus primeiros JJOO. Como o seu adestrador e amigo, Frank Casañas, pensa que o seu obxectivo ten que ser chegar á final porque aí todo pode ser posible. "Estou tranquilo porque teño confianza no traballo que fixemos", comenta Caicedo.
"Pontevedra é unha cidade que me gusta moito, a súa tranquilidade axudoume a enfocarme e a conseguir as miñas metas"
Este traballo para chegar aos Xogos foi duro, pero tamén ameno. "Somos como unha familia, estes mozos (di sinalando a mozos de 15 anos que tamén adestra Casañas) son como irmáns pequenos cos que che molestas, ris e escoitas música", comenta Caicedo. Este ambiente hogareño atópao en Pontevedra, unha cidade "tranquila" que lle axudou a enfocarse e a crecer profesionalmente.
Esta petición foi pasada á Secretaría do Deporte da Xunta, que aceptou e deu todas as facilidades a Evelin Yazmin Aguilar (heptatlón) e María Lucelly Murillo (lanzadora de xavelina). Xunto a elas viaxou o seu adestrador Mauricio Hernández para realizar a súa preparación en Pontevedra.
A razón para elixir Pontevedra, como nos comenta o Profe Mauro Hernández, é simple: o clima e o fuso horario. Estas atletas adestran en Bogotá, que se atopa a máis de 2.000 metros de altitude: "é un clima moi frío". Xa que logo, a mellor forma de adaptarse sen facer 14 horas de viaxe é parar en Pontevedra. As atletas xa non van sufrir tanto polo jet lag e xa se aclimataron a un lugar que se atopa ao nivel do mar.
Onte, sobre as dez da mañá, Aguilar estaba a practicar salto de altura xunto ao ‘Profe Mauro'. A atleta especializouse en modalidades compostas.
Nas olimpíadas de Río de Janeiro xa participou na modalidade de heptatlón. Fíxose coa posición número 15. "O obxectivo deste ano é situarse entre a oitava e a décima praza", comenta Mauricio.
Murillo, de 30 anos, encara os seus primeiros Xogos Olímpicos. Participará en lanzamento de xavelina, unha disciplina que xa lle deu grandes alegrías como a prata deste ano nos Xogos Suramericanos , onde bateu a súa marca persoal con 59.92 metros.
