Deporte Local Pontevedra
Chega o Protour a Pontevedra: consulta aquí as restriccións de tráfico
Varios dos principais deportistas do ProTour FETRI chegaron a Pontevedra este xoves e participarán o venres en diferentes actos destinados ao Gold Group formado por internacionais e campións de España.
Xa están preparados tamén os exclusivos tritraxes da firma Austral que vestirán todas e todos os triatletas con praza na primeira edición da competición das estrelas do tríatlon nacional. Realizados coa tecnoloxía utilizada para a vestimenta de competición nas Series Mundiais do Tríatlon, cada uniforme personalizouse con diferentes detalles elixidos por cada deportista.
Os tritraxes do ProTour FETRI confecciónanse con tecido de carbono que ofrece unha capacidade de secado catro veces máis rápida que outros materiais, tres minutos fronte aos doce ou quince habituais. A combinación do tecido especial co deseño específico para o tríatlon permite obter unha peza elástica e moi lixeira que facilita as brazadas na auga e é altamente transpirable.
Deportistas que utilizaron o modelo que Austral fabrica para triatletas en Series Mundiais cualificárono como "un pneumático de clasificación" en comparación coa Fórmula Un e tras comprobar as súas características especiais que permiten gañar décimas ao crono, especialmente no segmento de natación.
OPEN DAY E RECEPCIÓN OFICIAL. ProTour arrinca o venres coa xornada Open Day matinal dos deportistas do Gold Group –Anna Godoy, Sara Pérez Sala, Carol Routier, Tamara Gómez, Mario Mola, Javier Gómez Noya, Fernando Alarza, Antonio Serrat, Iván Raña, Javier Lluch e Alberto González– no Pazo da Cultura de Pontevedra, na que compartirán unhas horas con medios de comunicación locais, rexionais e nacionais.
Ás 18 horas, no mesmo lugar, terá lugar a Reunión Técnica á que están convocados todos os participantes e na que se explicarán as normas e detalles dunha competición innovadora en dúas xornadas e con formatos eliminatorios. Posteriormente celebrarase unha recepción oficial de benvida.
O sábado 12 de outubro o programa de actos arrincará ás 13:30 horas cunha proba TriDiver para nenas e nenos de 5 a 10 anos. ás 15 horas comezará o Campionato de España de Tríatlon Contrarreloxo Individual para Grupos de Idade, e as saídas feminina e masculina das primeiras probas do ProTour FETRI serán ás 17:15 e 18:45 respectivamente.
