52 anos tardou o Pontevedra en disputar outra edición do tradicional Trofeo San Roque de Betanzos. Entón, na terceira, disputada o 16 de agosto de 1966, co equipo en Primeira División, aínda que xogando na Cidade dos Cabaleiros cunha formación que en nada se pareceu á que popularizou o Hai que Roelo, o Brigantium, de Terceira, deu a sorpresa no Carregal, o antigo campo, a uns metros do escenario do xoves, vencendo por catro a dous. O que non puido conseguir aquel histórico conxunto granate logrouno o xoves a escuadra que agora adestra Luismi Areda, que levou a 52ª edición do torneo betanceiro.
Era o noveno partido de pretempada do Pontevedra, que chegou ao García Hermanos logrando os catro trofeos estivais que disputou ata o momento, e invicto tras os oito encontros anteriores, dous deles de medio tempo (no triangular de Moraña). En Betanzos, ante un Primeira Galicia, non foi menos, gañou o quinto partido de nove e a vitoria sérvelle para adornar as súas vitrinas co seu quinto trofeo deste verán grazas aos goles de Mouriño, no tramo final do primeiro acto, do debutante Mikel Arruabarrena e de Kevin Presa, este de penalti, cando o partido se achegaba ao final.
O choque estivo moi animado no seu primeiro tempo. O Betanzos atopouse cómodo fronte a un Pontevedra que tardou en tomarlle o ritmo ao partido e deu espazos ao conxunto local para tutealo en diferentes momentos. En todo caso, o xogo carecía de profundidade polo que nin un nin outro foron capaces de xerar ocasións fronte aos marcos defendidos por Javi García e Diego.
O peor tivo lugar no minuto 25 coa lesión de Pibe, que debeu ser substituído por Iñaki. Tras o pequeno sobresalto, o partido transcorreu na mesma liña de escasa profundidade ata que chegou a mellor acción do primeiro período, cando este enfilaba o seu final. Produciuse no minuto 42. Unha xogada elaborada do Pontevedra levou o coiro aos pés de Mouriño quen, desde o frontal, sen presión defensiva, se atopou cunha desas situacións que todo xogador de clase desexa. Orientouse e colocou unha rosca imparable para unha meta local que, a pesar de estar ben situado, non puido alcanzar o disparo.
Na segunda metade o equipo lerezano fíxose dono do encontro. O seu control do xogo fixo recular ao Betanzos. O partido converteuse nun monólogo dos visitantes que, sen forzar excesivamente no seu xogo ofensivo, buscaron sorprender a Javi García con disparos desde a frontal da área. Iñaki, Mikel Arruabarrena e Jesús intentárono desde diversas posicións da semiluna facendo que o porteiro local se convertese no home máis destacado do encontro.
Tras o quíntuplo cambio realizado por Luismi para o tramo final, o Pontevedra aumentou as diferenzas no marcador. Fixo o 0-2 no minuto 85 por medio do debutante Arruabarrena, que rematou en ferro un centro desde a esquerda.
No minuto 89, nunha internada pola dereita do ataque, Pedro Vázquez foi derrubado por Kevin Andrade dentro da área, transformando o penalti Kevin Presa. Era o corolario a un adestramento con árbitro que nada tivo que ver con aquel histórico duelo de 1966.
Desta forma, o Pontevedra CF segue invicto, pero xa pensa na seguinte cita do calendario. O sábado, os de Luismi Areda enfróntanse ao Racing de Ferrol ás 20.00 horas na vixésima edición do Torneo Vitoria Memorial Moncho Rivera na Malata. Será outra proba crave na pretempada granate.
