Xa está todo listo para que a cidade do Lérez acolla un novo grande evento deportivo de ámbito internacional. Despois do éxito do Mundial ITU Multisport que se celebrou a primeira semana de maio, agora é a quenda da loita co Campionato de Europa júnior. Desde este luns ata o domingo, as rúas da cidade volverán estar abarrotadas e impregnadas dun ambiente de competición.
Este campionato reunirá en Pontevedra a 37 países e máis de 1.000 persoas, entre deportistas, árbitros e staff técnico. Ademais, espérase que o Europeo atraia a un elevado número de afeccionados que, como pasou no Mundial Multisport, deixarán un gran beneficio económico en Pontevedra e arredores. Cabe recordar que esta cita é a máis importante en España, tras os Xogos Olímpicos de Barcelona 1992, e pon ao país no centro europeo das loitas olímpicas.
Ao longo de toda a semana, os mellores loitadores europeos na categoría júnior intentarán facerse co título nas diferentes modalidades: grecorromana, loita libre olímpica e loita feminina. A primeira será a que estree o campionato e alargarase ata o mércores, mentres que a libre terá lugar do mércores ao venres e a feminina do venres ao domingo, día no que terá lugar a cerimonia de clausura.
O feito de que Pontevedra sexa a sede do Campionato de Europa crea unha motivación extra nos competidores galegos, xa que poderán exhibirse e intentar loitar polas medallas ante a súa familia e amigos. É o caso de Nerea Pampín (Club Keltoi de Vila de Cruces), Carlos Yobani (Club de Loitas Olímpicas de Vilalba) e Santi Sánchez (Club Keltoi de Vila de Cruces). Os tres deportistas representarán a España xunto con outros 27 loitadores (haberá dez en cada modalidade deportiva).
Ademais, tanto Pampín, como Yobani ou Sánchez estiveron ou continúan bolseiros no Centro Galego de Tecnificación Deportiva de Pontevedra, do que saíron grandes loitadores internacionais como é a pontevedresa Lydia Pérez ou Pablo García, que a día de hoxe son referentes da loita olímpica en Pontevedra. O obxectivo dos tres loitadores, e doutros moitos participantes no Campionato, é intentar clasificarse para o Mundial de Estonia que se celebra en agosto, polo que o nivel será moi alto e a esixencia,considerable.
APOSTA. A Boa Vila continúa facendo honra ao seu alcume de cidade "deportiva". Ao longo deste ano acollerá diferentes campionatos de gran nivel como xa foi o caso do Mundial ITU Multisport a principios do mes de maio e agora do Campionato de Europa, que terá lugar toda a semana. Ademais, a finais do próximo mes, de novo a cidade do Lérez será o escenario dunha competición internacional, o Mundial de balonmán júnior, compartindo a organización con Vigo.
Sen dúbida, tanto as instalacións deportivas como o modelo de cidade son as idóneas para acoller este tipo de competicións, ademais da tradicional vinculación de Pontevedra co deporte e a súa grande experiencia organizativa.
