30-31. Profesionalidade, emoción e derrota

O Cisne Dicsa Modular estivo a piques de meter nunha lea ao Sinfín Cantabria. O equipo pontevedrés ofreceu unha lección de profesionalidade competindo ata o último segundo e máis aló del: literalmente. Co tempo esgotado, Chan lanzou un penalti que se estrelou na madeira e impediu a igualada do bloque branco. 30-31 final.

O duelo xogouse no primeiro tempo ao ritmo que quixeron os de Jabato e no segundo acto ao que interesaba aos cántabros.

A primeira metade foise voando, a un ritmo case provocador. Pombo, ben secundado por un elevado Pablo Picallo. mostraba o camiño aos seus compañeiros. O lateral dereito pontevedrés botouse ao equipo ás súas costas e ofreceu un recital de lanzamento exterior e penetracións que o reconciliaron co balonmán.

Alén da cancha, o Sinfín recorría aos lategazos de Zungri e a conexión co pivote Ferreiro para mandar no electrónico, aínda que sempre sen grandes vantaxes. Como máximo, tres goles.

Ata ese momento todo eran sorrisos. Pero o rictus dos visitantes cambiou cando o Cisne Dicsa Modular subiu un punto o nivel defensivo. Os pontevedreses fóronse ao descanso un gol arriba.

No segundo acto, a tensión foi crecendo co paso dos minutos. A Pablo Picallo case lle parten a cara. Os colexiados sumáronse á festa con decisións incomprensibles que axudaron a Ostroushko e Vallés a dar a volta ao marcador. Pero cando máis quentaba o sol, entre a gallardía de Arias e Gayoso e o crecemento defensivo impulsado por Calvo meteron ao Cisne Dicsa no duelo, ata o extremo de dispor a última bóla para igualar. Pero a Chan faltáronlle uns centímetros de portería desde os sete metros e o choque e a permanencia fóronse a Santander.