A XIX Subida á Escusa terminou este domingo tras un fin de semana onde os coches foron os auténticos protagonistas.
Nesta edición cumpríronse todos os prognósticos que apuntaban a Alexis Vieitez como campión xa que o poiense non defraudou en casa e levou o campionato ante os seus veciños cun tempo de 03.55.922 minutos, mantendo así o liderado do campionato galego que xa tiña antes do comezo desta subida.
O piloto da escuadra que levaba a organización da proba, Buxa Motor Poio, foi o máis rápido nos dous días de competición. Xa o sábado terminou as dúas primeiras mangas en primeira posición cunha gran vantaxe sobre os seus perseguidores e este domingo volveu demostrar porqué era o favorito para ser primeiro nesta competición e para alzarse co título do campionato galego de montaña que con esta vitoria ten case certificado.
Alexis Vieitez superou ao outro candidato á vitoria e último campión, Pablo Rei (T.Martínez Racing), que quedou segundo cun tempo de 03.59.365 minutos no que se prevía como un dos duelos máis emocionantes da xornada e que non defraudou aos asistentes.
Santiago Abad destinou o premio á Difusión Felina Pontevedra, a única protectora de gatos na cidade do Lérez
Para pechar o podio, en terceiro lugar quedou o piloto da escuadra Outeda Racing, Martín Villar., cun tempo de 04.01.898 minutos.
En canto aos vehículos carrozados o máis rápido foi o Lamborghini Gallardo de Santiago Abad (Corredoira Team) que volvía á competición logo dun parón e que foi oitavo na clasificación xeral. Abad correu cun plus de motivación tras unha promesa que realizou e que cumpriu unha vez terminou a competición, doando o premio á Difusión Felina Pontevedra. O vehículo carrozado que realizou o segundo mellor tempo foi o Peugeot 306 Maxi de Manuel Senra que seguiu moi de cerca a Abad.
O bo tempo que acompañou en ambos os días de competición e a paixón que o automobilismo desata entre os pontevedreses, fixo que a subida desde Sartal a Escusa enchésese de xente que nos diversos tramos gozou do ruxir dos motores e do mellor rally de montaña que ofreceron todos os pilotos.
Os afeccionados que se achegaron estiveron desde primeira hora da mañá gardando sitio e animando a todos os participantes, pero especialmente a Alexis Vieitez que ademais de ser un dos favoritos á vitoria corría na casa.
