O Rayo Vallecano proclamouse campión da I Copa Ribadumia Clae Viaxes de categoría infantil que, durante a pasada fin de semana, celebrouse na Senra para o goce dos nenos que o disputaron e os afeccionados que se deron cita para velo desde as bancadas.
O Rayo Vallecano foi o mellor e o máis regular dos 30 conxuntos que se deron cita neste evento e que loitaron desde o pasado venres polo trofeo de campións, o obxecto de desexo de todos eles. Na gran final enfrontouse ao Astur ao que se impuxo por 4-0.
Ambos os conxuntos chegaron ao partido definitivo tras vencer os seus correspondentes encontros de semifinais. O Rayo Vallecano venceu por 3-0 ao JEF United, mentres que o Astur levou o choque pola mínima ante o Guangzhou chinés (1-0).
Os dous campos da Senra acolleron un grande espectáculo futbolístico coa celebración de 82 encontros diferentes durante os tres días que durou esta primeira edición dun torneo que chegou coa intención de quedar por moitos anos máis.
O evento non puido ir mellor, na retina aínda estaba o celebrado hai unha semana en categoría benxamín que serviu como referencia para que neste non houbese fallos ou problemas en canto a organización. E non os houbo. O torneo disputouse sen incidencias e os novos futbolistas puideron gozar dunha gran fin de semana de fútbol e diversión. As bancadas da Senra foron unha auténtica festa de inicio a fin, cos familiares e amigos dos equipos chegados de toda España, e o estranxeiro, animando e dando alento ás súas estrelas do balón.
A primeira edición da Copa Ribadumia Clae Viaxes dáse por finalizada, sendo un éxito e con dous primeiros campións que, sen dúbida, deixarán o seu nome escrito na historia.
