A portería da Sociedade Deportiva Teucro está a vivir unha revolución. Ningún dos tres porteiros que acabaron a pasada tempada defenderán as redes do Teucro na próxima campaña.
Á baixa do arxentino Fede Wermbter hai que sumar a de Raúl Pérez e a do serbio Stefan Manolojvic, que se fixeron públicas a semana pasada. Son baixas non oficiais segundo o club, pero Stefan xa se despediu da afección e Raúl foi presentado polo Club Balonmán Reconquista de Vigo como nova fichaxe.
O pasado 29 de xullo, o porteiro serbio Manojlovic anunciou tanto na súa conta de Twitter como na de Instagram que non continuaría na entidade teucrista. A pesar de só levar unha tempada como parte do persoal dos azuis, o internacional serbio en categoría júnior cualificou a súa experiencia en Pontevedra como "especial" e mostrouse agradecido: "Grazas pola confianza, grazas polo apoio e polas novas amizades! Por sorte puidemos terminar a última tempada cumprindo un obxectivo, o cal foi moi duro". Acabou a súa mensaxe desexando sorte ao club "nas súas próximas batallas".
Dous días máis tarde, o Club Balonmán Reconquista de Vigo anunciou a fichaxe do porteiro vigués Raúl Pérez a través tamén das redes sociais. Raúl volve á cidade na que comezou a formarse no balonmán. O porteiro é a segunda incorporación procedente do Teucro ao club vigués despois do mozo extremo esquerdo de 20 anos, Cristian Remeseiro.
Estas dúas baixas, en palabras da adestradora do Teucro Irene Vilaboa, "débense a decisión técnica". Polo momento, a entidade pontevedresa non fixo oficial a baixa de ningún dos dous porteiros suplentes durante a tempada 2020-2021. Aínda así, o club espera anunciar esta semana tanto as súas baixas como a fichaxe de dous porteiros que substitúan ambas as saídas máis outro xogador. Estas dúas altas non se pecharon, pero desde a dirección técnica esperan que se poida pechar o persoal antes do inicio da pretemporada que empezará a semana que vén.
Polo momento, o Teucro só conta cun porteiro, o alemán Joshua Rau, que chegou o pasado mes de xullo para suplir a baixa de Werbter. Rau é a primeira incorporación das catro que fixo oficial o club pontevedrés no que levamos de verán.
A maioría do núcleo duro do persoal continúa para a próxima tempada. Só seis xogadores foron baixa: os tres porteiros (Fede Wermbter, Stefan Manolojvic e Raúl Pérez), Samu Pereiro, David Rey e Cristian Remeseiro.
O club só incorporou catro novos xogadores ata a data. O porteiro alemán Joshua Rau que chega para suplir a baixa de Wermbter foi a primeira fichaxe. Despois fixéronse oficiais as altas de Gonçalo Morais e Álvaro Moreno, dúas primeiros liñas que suplen a saída de Pereiro. O último en chegar foi o extremo dereito Martín Dávila. Para pechar o persoal o Teucro debería fichar dous porteiros e un central.
