Todo o mundo ten a súa propia historia detrás, nutrida en moitas ocasións por grandes experiencias, situacións e anécdotas que acaban marcando no tempo. Incluso algunhas veces a historia dunha persoa adoita estar relacionada coa doutras. É o caso dos serbios Marko Dzokic, Nikola Perovic e Nenmja Bojicic; cada un tiña o seu propio camiño, que curiosamente partiu desde o mesmo punto e acabou atopándose de novo sen que ningún o esperase.
Hai dez anos, os tres xogadores teucristas coincidiron nunha convocatoria da selección xuvenil de Serbia para prepararse para competicións internacional. A pesar de que nunca chegaron a competir, tiveron a oportunidade de compartir unha bonita experiencia que adoita marcar a carreira de todo deportista. Ese foi un punto de inflexión para que cada un construíse a súa propia vida a nivel deportivo.
Mentres que Marko Dzokic xa estaba máis que fincado en España —xa que naceu en Pontevedra, cando o seu pai (Goran Dzokic) xogaba co Teucro hai 30 anos—, Nemanja Bojicic labrouse unha carreira nas máximas divisións do balonmán de Serbia e Turquía, co Estrela Vermella e o Antalyaspor, respectivamente. Por outra banda, Perovic decidiu xogar en categorías máis baixas en Serbia, Bosnia e Suíza.
Marko Dzokic: "Nunca tiven a sorte de vivir en Pontevedra, pero teño esa sensación de cumprir un soño"
Cheo de ambición, Nemanja decidiu deixar a súa vida en Belgrado hai tres anos para dar o salto ao balonmán español, que para el "é o mellor do mundo". Bojicic recibiu unha oferta da Vila de Aranda na súa etapa en Asobal e non o dubidou xa que "tiña os meus propios obxectivos para crecer". Tras o seu paso polo conxunto arandino, o serbio foise para Palma del Río, onde estivo unha tempada.
Este verán fichou polo Condes de Albarei Teucro, "que me transmitiu moita seriedade. Ademais, a súa longa historia como club chamoume moito a atención. Espero que poidamos volver a Asobal pronto, porque quero estar na máxima categoría outra vez".
"Todo o mundo me falaba ben deste equipo, que coidaban os xogadores. Pensei que con todo iso detrás nada podía saír mal", anota Bojicic sobre a súa decisión de vir ao Teucro. Pero o que non se esperaba o de Belgrado é que se reecontraría en Pontevedra con dous vellos coñecidos, Dzokic e Perovic.
Nemanja Bojicic: "Esperaba coincidir con Marko nalgún momento en España, pero non sabía que podería chegar a ser no Teucro"
"É verdade que me esperaba coincidir con Marko nalgún momento en España, porque el leva aquí toda a vida e podía darse. O que non me esperaba é que fose aquí. Ata que se fixeron oficiais as fichaxes non o sabía", destaca o pivote, entre risas.
Certo é que Marko Dzokic viviu toda a súa vida en España, pero nunca o fixo en Pontevedra a pesar de que o seu pai vestise o elástica azul. "Nunca tiven a sorte de vivir aquí, pero teño esa bonita sensación de cumprir un soño de poder estar na cidade onde naciches. Teño a oportunidade de estar na miña cidade de orixe, por dicilo dalgún xeito", explica Marko Dzokic.
A pesar de estar só un ano xogando en Serbia por problemas "de lesións", a primeira liña recalca que "teño un dobre sentimento. Estou moi arraigado á miña nacionalidade. Toda a miña familia é de Serbia, en casa falamos serbio, nas competicións deportivas sempre animo aos equipos serbios... Con todo tamén sinto moi español pola forma de pensar e de vivir. Identifícome con moitas cousas de España e non podería elixir. É un 50-50 claramente".
Nikola Perovic: "A ambición tróuxome aquí, porque quero xogar a un nivel mellor e labrarme unha carreira como xogador en España"
O arraigamento en España de Dzokic contrasta á perfección coa primeira experiencia de Nikola Perovic no país. Do mesmo xeito que o seu compañeiro Bojicic, "a ambición tróuxome a España, porque quero xogar a un nivel mellor e labrarme unha carreira como xogador neste país".
O lateral non o dubidou en ningún momento cando lle chegou a oferta do Teucro e todo está a ser tal e como se esperaba. "Aquí todo é como me contaron: a forma de vivir, a xente... Ademais tiven un gran recibimento por parte de todos. As expectativas que tiña cumpríronse completamente", afirma Perovic.
Dos tres serbios foi o que máis tardou en chegar ao Teucro por problemas burocráticos, polo que lle custou un pouco adaptarse deportivamente. Aínda así, el cre que "é moi pronto para facer unha valoración máis completa de como estou. Por agora creo que ben e espero cumprir os obxectivos".
