A resonancia magnética á que se someteu Yoan Balázquez descartou que o lateral cubano dos Condes de Albarei Teucro sufra unha rotura do ligamento do seu xeonllo dereito, polo que o xogador poderá volver ás pistas antes de que finalice a tempada, informou o club pontevedrés.
Balázquez, segundo máximo goleador da liga Asobal con 118 tantos, lesionouse o pasado mércores no partido que enfrontou ao seu equipo co Helvetia Anaitasuna en Pontevedra.
As probas médicas revelaron que o lateral sofre unha escordadura no xeonllo que lle impedirá xogar o próximo partido ligueiro contra o Fraikin Granollers e a súa reaparición dependerá da evolución da lesión.
