Rufo recolleu o martes o primeiro premio Estrella Galicia desta tempada como xogador do mes, ao ser o máis máis votado polos afeccionados do Pontevedra CF a través das redes sociais do club. Con máis dun 80% dos votos, Rufo impúxose na votación a Eneko Zabaleta e Jorge Fernández.
O dianteiro granate agradeceu aos seus compañeiros e á afección a obtención do galardón e sostén que "é un premio individual nun deporte colectivo. O traballo do equipo está a ser bo e danmo a min como llo poderían dar a calquera dos meus compañeiros".
O dianteiro do once lerezano está xa coa mente posta no duelo de Copa contra o Cartaxena tras o pau ante o Coruxo, "Estamos doídos pola derrota, pero xa coas pilas postas e con ganas de irnos con bo sabor de boca nas vacacións".
Definiu ao torneo do K.O. como "un torneo bonito de xogar, bonito para o afeccionado e que transmite ilusión. Desde o principio tocounos unha Segunda División. Intentaremos dar o máximo para ofrecer as máximas alegrías á nosa xente".
Nese duelo, Pasarón volverá ter o seu aforamento limitado debido aos protocolos covid 19. Nese sentido, Rufo admite que "botamos de menos á afección".
E é que Pasarón é un campo moi cálido, non só para os xogadores locais. "Xoguei como visitante e agora como local aquí e a afección nótase unha chea nun campo como Pasarón, xa que as bancadas están pegadas ao céspede, con ese Norte que aperta tanto. Cando vés de fóra, nótase o ambiente. Dá ás ao equipo local".
O perfil de xogo que desprega Rufo e a súa capacidade de sacrificio encaixan á perfección co que historicamente demandou o Pontevedra. "Desde que cheguei, sinto como en casa, tanto no futbolístico como na vida persoal. A miña familia e eu atopámonos moi a gusto. E no deportivo, a afección sempre me deu moito agarimo desde o primeiro día. Foi como chegar a un sitio no que levaba moito tempo, pero no que nunca estivera. Intentarei seguir achegando todo o que poida para que a xente estea contenta co meu traballo", apuntou.
