Os equipos veteranos do Pontevedra, Céltiga e Celta de Vigo recadaron na xornada do pasado domingo 1.400 euros no triangular disputado no Campo Salvador Otero da Illa. A cantidade foi recadada mediante a venda de entradas e será doada á Federación Galega de Enfermidades Raras e Crónicas, que centra os seus esforzos en axudar aos afectados por elas e en dar apoio aos familiares dos afectados.
O conxunto granate estivo representado por algunhas das lendas do fútbol pontevedrés, como Rafa Sáez, Tonete, Cota, Modesto, Padín, Toño García ou Ricardo Fernández. Ademais, tamén se viu a Milucho na banda,que desempeñou os labores de adestrador.
Os do lérez comezaron empatando a cero goles co equipo insular e pouco despois perderon o seu partido contra o Celta, que foi o gañador do torneo. No caso do club vigués tamén xogaron exprofesionales como Pablo Couñago ou Manel Fernández.
Ao finalizar os partidos houbo un petisco no campo e tamén un homenaxe a título póstumo a Amador Diz Otero, exdirectivo do Céltiga. Os xogadores mostráronse moi satisfeitos co éxito do evento.
O triangular solidario xurdiu a partir do caso de Leo, un bebé de Meis que sofre unha enfermidade que lle impide respirar. O Cétiga contactou co pai do neno, que tamén xoga na liga de Veteranos, e coa colaboración de Fegerec o torneo saíu adiante. Os resultados económicos foron un éxito e, desde as bancadas, máis de 500 persoas puideron gozar dos tres partidos que se disputaron.