O Pontevedra chega ao verán con tendencia ao cambio

Espérase un verán movidito nas oficinas do Municipal de Pasarón con diversos cambios no persoal granate, unha remodelación que se está levando con calma debido á recente incorporación do Toni Otero como novo director deportivo.

Unha sensación similar á que ofrecía o pasado verán a estas alturas a entidade que preside Lupe Murillo que deixaba entrever varios cambios no vestiario granate e que, finalmente, levou a cabo con 13 xogadores dados de baixa (José Rivera, Edu Sousa, Brian Xaén, Álex Fernández, Alberto Campillo, Busco, Adighibe, Javi López, Nacho López, Pedro Vázquez, N"Diaye, Naveira e Jesús Berrocal) e 12 xogadores novos (Imanol García, Mario Fernández, Charles, Óscar Fernández, Aitor Núñez, Borja Martínez, Oier Calvillo, Álvaro Cortés, Jorge Fernández, Xisco Campos, como novas fichaxes e Martín Diz e Samu Vilariño, da filial) de face á tempada que acaba de finalizar.

O cambio do pasado curso non é un caso illado, senón que forma parte dunha tónica habitual na última década, onde os movementos estivais nas oficinas de Pasarón adoitan superar a decena de saídas e chegadas, salvo nun par de tempadas onde os números foron máis baixos.

Nas últimas dez tempadas o verán que menos modificacións sufriu o vestiario granate foi na tempada 2015-2016 con tan só seis cambios no persoal (saíron: Benja, Miguel Centrón, Fran Fandiño, Jorge Rodríguez, Álvaro Muñiz e Diego Arnejo e chegaron: Ramón Verdú, Alejandro, Álex Fernández, Miki Villar, Borja Martín e Álvaro Quijeiro).

Con todo no outro extremo da balanza atópase o curso 2011-2012 onde o conxunto granate tivo un total de 24 baixas e tan só 18 novos xogadores, sendo tres da filial. Ese curso saíron de Pasarón Sergio Castaño, Gabi Misa, Noel Alonso, Yahvé, Mmadou Keita, Adrián Cruz, Pepe Aicarte, Dul, Juan Morais, Claudio Giráldez, Igor, Teo Tirado, Álex Bao, Quintana, Cristian Castells, Rubén Reyes, Nacho Alonfo, Rubén Pardo, Douglas, Santi Amaro, ían Espadas, Neru, Carlos Padín e Ajiboye.

No resto de cursos dos últimos dez anos, os cambios movéronse na decena de xogadores, chegando nalgúns casos ás 15 altas (tempada 2017-2018, con dous xuvenís na cota) ou con 16 saídas (tempada 2012-2013).

Dos últimos cinco anos, o curso que menos movemento tivo foi o 2019-2020, onde tan só saíron nove homes e entraron 10, sendo soamente un deles xogador da filial (José Rivera).

Con todo na primeira metade da década que acaba de concluír e quitando os cursos mencionados anteriormente (2012-2013 e 2011-2012) as chegadas e as saídas estiveron máis equitativas, sendo a 13-14 a que máis diferenzas tivo con 14 xogadores novos (tres deles procedentes da filial) e nove saídas.

Os movementos estivais en casa granate están á orde do día e parece que o presente curso non será unha excepción con varias saídas xa confirmadas.