O grupo de deportistas afeccionados Ponte un reto presentou este xoves no Hotel Avenida a proba ciclista extrema na que participarán do 24 ao 30 de abril. O conxunto pontevedrés ten por diante o desafío de percorrer 660 km por Marrocos durante seis etapas, nunhas condicións climatolóxicas adversas, ao longo dun circuíto agreste onde o GPS será clave para orientarse e non perderse nas dunas marroquís. E é que este reto é unha das dúas probas que o colectivo deportivo realizará este ano para reunir fondos e dar visibilidade á enfermidade dela. Unha iniciativa solidaria que conta co apadriñamento de prestixiosos deportistas como Óscar Pereiro, David Cal ou David Amor, entre outros.
O grupo Ponte un reto está integrado por seis amigos de Pontevedra: José Víctor Fernández, Francisco Baliñas, Víctor Pampín, Manuel Caramés, Pablo Fernández e Borja Vence. Destes deportistas, catro serán os que participen na proba extrema do deserto, mentres que o equipo ao completo, xunto con Ramón Mella, disputará, así mesmo, a carreira non-stop Powerade Madrid-Lisboa.
A poucas semanas do evento, José Víctor Fernández analiza as adversidades do evento deportivo extremo. "En primeiro lugar está o terreo xa que é moi difícil, ao ser escarpado con montaña e parte de deserto. A segunda das dificultades no deserto son as temperaturas extremas durante cada xornada. Tamén inflúe que non imos durmir demasiado cómodos, senón que o faremos en tendas no deserto xunto co resto de compañeiros. Finalmente, a pesar de que soe a tópico, o máis difícil será que o corpo aguante, é dicir, que o cu aguante todas esas etapas sobre a bicicleta", puntualiza Fernández.
A etapa maratón será a de maior dificultade ao ter que percorrer os participantes unha distancia de 240 km durante dous días, con noite no deserto sen ningún tipo de asistencia técnica.
Para soportar fisicamente a dureza da carreira desértica, José Víctor Fernández explica a preparación previa do equipo ciclista: "Levamos aproximadamente oito meses de adestramento, unha preparación de máis de cinco días á semana subidos tanto á bicicleta como realizando adestramento en xeral. Ademais seguimos unha nutrición variada, informámonos das condicións do Sahara e logo preparamos unha nutrición específica para a proba".
Por unha boa causa
Catro deportistas do grupo 'Ponte un reto' disputarán a Titan Desert
Catro dos seis integrantes de 'Ponte un reto' disputarán este mes a esixente carreira ciclista Titan Desert. Esta iniciativa cidadá nace para dar visibilidade á loita contra o ELA traspasando as fronteiras do deporte