POIO. O Poio Pescamar FS enfróntase mañá ao Viaxes Amarelle ( 17.00 horas, Sacra Familia - A Coruña ), no que será un derbi de alta tensión con moito en xogo. Entre os dous equipos só hai un punto de diferenza e un posto na táboa: o Poio é décimo e o Amarelle noveno.
Este tipo de partidos sempre son especiais, pero máis cando o equipo rojillo leva dúas derrotas consecutivas e, ademais, a súa rival conta con baixas de gran importancia, como a da internacional Lucía Nespereira e a de Laura. Ademais, a capitá Patri está convocada tras a súa lesión pero posiblemente non gozará de minutos.
Con estas ausencias, o Poio Pescamar FS terá que aproveitarse dun equipo que tampouco vive un bo momento. As coruñesas levan catro xornadas sen atoparse coa vitoria e o seu último resultado positivo foi ante o Valdetires Ferrol.
Ademais, no partido de ida, o Poio atopouse cun equipo sen baixas e aínda así puido levar algo positivo, pero finalmente caeu por dous goles a tres. Agora, o conxunto de Marcio Santos conta cun estado físico moito mellor que naquel momento e o seu xogo é moito máis vistoso e eficaz, ao que hai que engadir a diminución de erros defensivos en cada duelo disputado.
Afección
Como xa é costume nos encontros disputados polo Poio Pescamar FS en Galicia, a pena ‘Os Miñocas' organizou unha viaxe para que o equipo non estea só na Coruña. Así, uns 60 afeccionados estarán a apoiar ás rojillas ante o Viaxes Amarelle para que sentan como en casa.
Desta forma, a presión de xogar nunha pista rival será menor, pero a necesidade de puntuar na Coruña segue sendo enorme, xa que a vitoria significaría subir un chanzo máis na táboa e dar un paso máis cara ao obxectivo da permanencia, algo que queren alcanzar canto antes.
Cabe destacar que para este encontro Marcio Santos conta con todo o persoal dispoñible, sen ningunha baixa.
Convocatoria do Viaxes Amarelle: Pau e Leti; Musta, Luci, Cruz, Monchi, Patri, Sheila, Dolo, María e Lago.
Convocatoria do Poio Pescamar FS: Carmen e Silvia; Charo, Ceci, Kiko, Yoly, Claudia, Peke, Elena, Pomba e Mar.