A última proba de Bea Gómez Cortés no Campionato Europeo de Glasgow chega este domingo, día en que se dá por finalizada unha competición que comezou o pasado mércores, hai catro días, na proba de 400 metros estilo libre. A pontevedresa disputou este sábado os 200 metros estilos, onde conseguiu o sétimo mellor tempo da súa serie. Cunha marca de 2.13.23, conseguiu mellorar o tempo co que partía e que a situaba como a peor do seu grupo (2.14.36).
Outra española acompañou a Bea na súa serie de nove xogadoras. Paula Juste obtivo a quinta posición e tamén quedou fóra da final. Ningunha delas puxo coas rápidas Ilaria Cusinato, de Italia e Zoe Vogelmann de Alemaña. A proba á que fará fronte o domingo será a de 400 metros estilo libre, na que a da Boa Vila parte coa sexta mellor marca (4.14.56). Esta será a súa última oportunidade de coarse nunha final do europeo, xa que nas dúas actuacións anteriores quedou nas roldas preliminares.
Este domingo enfróntase á súa última oportunidade de coarse nunha final, a de 400 metros estilo libre
A mellor versión de Bea polo momento puidemos vela o pasado mércores, na primeira das probas de Glasgow, en 400 metros estilos, onde grazas a un tempo de 4.39.13 colocouse como a sexta mellor das nove que formaron o seu grupo. Se na rolda preliminar da mañá do domingo conseguise destacar entre as oito mellores das cinco series, volveriamos vela pola tarde na rolda final, que chegaría ás 17.49 horas, como a antepenúltima proba feminina do campionato.
Algunhas das grandes rivais ás que a pontevedresa deberá facer fronte este domingo son a croata Matea Sumajstorcic, a serbia Anja Crevar ou a polaca Klausia Tarasiewicz, que parten coa mellor marca do seu grupo de nove nadadoras. Logo da súa participación no Campionato Europeo de piscina curta do Glasgow, o próximo gran reto de Bea Gómez Cortés chegará no 2020 nos Xogos Olímpicos de Tokio, para o cal tamén ansía chegar a súa compañeira de equipo, María Vilas.
A do próximo ano que entra non sería a primeira experiencia de Gómez nuns Xogos, xa que con tan só 17 anos, a nadadora do Galaico participou en Londres 2012, deixando boas sensacións e mostrándose como unha gran promesa do deporte. Pero polo momento toca despedirse cun bo sabor de boca dunha competición para a que tivo que demostrar e prepararse moito para poder clasificarse. Como representante do Club Natación Galaico, a pontevedresa pode sentirse orgullosa do que ata agora a feito.
Unha vez finalice o Europeo e Bea este de regreso a España, tocará deixar que pasen as datas do Nadal para volver pór os pés na terra e concentrarse ao máximo para intentar conseguir os retos do próximo ano.
