"Non recordo nada semellante", a frase de Evaristo Portela, director do Grupo Deportivo Super Froiz, é moi elocuente, xa que esta tempada as caídas e as lesións cebáronse co seu persoal.
Ata sete dos corredores importantes do Froiz tiveron incidencias graves que lles condicionaron a tempada e incluso tres deles (José Luis Mariño, Renato Macedo e Miguel Gómez) tiveron que pór fin ao exercicio de xeito prematuro.
A penitencia comezou no mes de marzo cando Francisco Medina tivo que renunciar a disputar o Memorial Valenciaga por ter que parar, durante máis dun mes, por culpa dunha tendinite. Logo de moito tempo, a formación alimenticia volvía dispor dun ciclista en condicións para gañar a proba dun día máis importante do calendario nacional.
Toda a planificación do conxunto pontevedrés estaba enfocada para que Medina tivese opcións de poder gañar nas rúas de Éibar, con todo a poucos día da disputa da proba tivo que anunciar que se paraba. Pero a desgraza non se detivo aí senón que no mes de xuño cando o obxectivo era disputar o Nacional, caeu no dique seco por culpa dunha mononucleosis.
Evaristo Portela. Director do Froiz:
"O que nos pasou esta tempada non é moi normal. Tanta caída é un verdadeiro calvario"
"Os corredores están moi comprometidos para terminar a tempada do mellor xeito posible"
O que foi fichado para ser o xefe de filas da formación alimenticia ha visto como os problemas físicos han condicionado o seu rendemento. Estaba descartado para a parte final da tempada, pero debido á praga de lesións e caídas o corredor estará ás ordes de Evaristo Portela na Volta á Galicia, aínda que "non ao cento por cento".
Medina non foi o único con problemas, xa que Miguel Gómez sufriu unha grave caída no Trofeo Federico Martín Bahamontes que lle provocou a rotura da clavícula e ten danado tres vértebras e ademais a pasada semana foi operado do cóbado dereito.
Outro dos corredores que tivo que pór fin á tempada de xeito prematuro foi José Luis Mariño, que na Volta a Zamora caeu por un terraplén de máis de 20 metros. Ten que estar tres meses de baixa e ten danadas varias vértebras.
CALVARIO. O terceiro dos ciclistas que tivo que baixarse da bici é Pedro Merino, que en xullo caeu na Volta a Zamora, pero a incidencia máis grave padeceuna en Toledo onde volveu caerse. A pasada semana estivo en Pontevedra onde foi atendido polo doutor Barragáns, ao que o Froiz quere mostrar o seu agradecemento porque "estivo moi pendente do ciclista". O diagnóstico foi que ten que parar durante catro semanas despois de que unha resonancia magnética indicase que presenta problemas no xeonllo.
Os outros dous corredores con problemas físicos son David González, que caeu en Toledo e ten danado o cóbado dereito, e o portugués Renato Macedo, que estará de baixa durante 40 días.
"O que nos pasou esta tempada non é moi normal. Non é unha cuestión de mala planificación senón de mala sorte porque todas foron caídas e cando estaban en posicións dianteira", comenta de xeito claro o director alimenticio que recoñece a súa desilusión porque "tiñamos depositadas moitas esperanzas e todo veuse ao traste".
A pesar do infortunio o director do conxunto pontevedrés confía en poder terminar ben a tempada porque "os corredores están a traballar ben e pondo moita ilusión".
O claro obxectivo do Froiz na recta da tempada é a Volta á Galicia que "é unha das nosas metas sempre e este ano con máis motivo, pero non podo pedirlle nada aos ciclistas porque chegan como chegan".
A Evaristo Portela está a custarlle poder confeccionar un sete con garantías, pero está convencido de que os ciclistas que están sans "darán o máximo. Medina fará un esforzo, aínda que non estea ao cento por cento".
David González e Sergio Míguez están chamados a ser os corredores importantes do cadro de persoal. Actualmente están concentrados en altitude en Navacerrada coa finalidade de preparar ben a súa participación na carreira galega, na que tamén estarán João Matías, Martín Bouzas, Medina e Rodrigo Enríquez.
