García-Alén vaise, pero queda

Carlos García-Alén deixa a presidencia do Condes de Albarei Teucro, pero non abandonará o club. É dicir: vaise, pero queda. O aínda máximo dirixente da entidade teucrista explicou este mércores que a súa renuncia, filtrada a semana pasada, corresponde a unha decisión persoal por motivos "familiares de conciliación". A renuncia será efectiva o 30 de outubro, coincidindo coa asemblea xeral. A actual directiva seguirá xestionando o club como comisión xestora ata eleccións, que terán que celebraranse previsiblemente en decembro. Se non hai candidatos, a mesma xunta será a encargada de continuar á fronte da entidade.

"O tempo é un ben escaso e, con todo a dor do meu corazón, non podo dedicarlle ao Teucro o que debería", comezou o presidente a explicar os porqués da súa dimisión. "A miña intención non era anunciar a miña marcha ata pouco antes da asemblea, pero fágoo xa porque a noticia coñeceuse hai uns días", sinalou. García-Alén manifestou que cre que non se enfocou ben" a súa dimisión: "Non me vou do Teucro, non desaparezo. Só deixo de ocuparme das miñas funcións como presidente. O club merece unha dedicación moi importante e eu non teño tempo, polo que dou un paso ao lado. Seguireime ocupando de cuestións económicas, que é o que me gusta". Deste xeito, o dirixente pontevedrés quixo darlle "normalidade" a un asunto que non debe ser entendido como "unha crise". "Entendo que de primeiras dese a impresión de desbandada, pero non é así", recalcou.

"Isto non pode ser entendido como unha crise nin unha desbandada. O club merece un tempo e eu non llo podo dar", di

García-Alén asegurou que a súa é unha decisión "moi meditada". "Non responde a motivos deportivos. Tomeina en maio, pero os meus compañeiros de directiva pedíronme que reflexionase e recapacitase. A miña marcha podía coincidir co descenso e iso podía xerar un prexuízo ao club xusto no momento no que se estaba confeccionando o equipo desta tempada", apuntou o presidente, que recalcou que cando se presentou ás eleccións do pasado decembro "non existía" a situación persoal que agora o conduce a deixar o seu cargo.

Agora, unha vez se achega a asemblea xeral, decidiu dar o paso definitivo: "Anuncieino a semana pasada á xunta directiva". Tras a citada asemblea, abrirase un prazo máximo de dous meses para celebrar unhas novas eleccións, tan só un ano despois das últimas. Namentres, será a directiva actual a que xestione o club como unha xestora. Se ninguén se presenta como candidato a presidente cos avais necesarios (10% dos socios), a propia xestora a que continuará dirixindo ao Teucro. "Eu seguiría como presidente desta xestora por un tema de axilizar cuestións burocráticas, pero podería ser calquera o presidente. Poderiamos continuar tal cal, incorporar persoas...", manifestou Carlos García-Alén.

COMPROMISO DE SEGUIR. O actual presidente animou a calquera dos seus compañeiros a que dese un paso adiante e se presentase ao posto que quedará vacante a partir do 30 de outubro, aínda que parece que a opción preferida é a de continuar como xestora: "Temos o compromiso de continuar ata onde podamos". Neste mesmo sentido, definiu "volver a Asobal, contar cunha ampla estrutura de canteira e recuperar o equipo sénior feminino" como os retos "por asumir" que cre "posibles". "Se nos deixan e nos apoian", matizou.

"Temos o compromiso de continuar ata onde podamos. Aínda hai retos por asumir, se nos deixan", apunta

Así mesmo, tamén abriu a opción a calquera "que considere que poida achegar ao club". Con todo, avisou que "a xestión non é fácil", polo que o Teucro "non é para aventureiros". "Agora todo está moito máis encarrilado que hai uns anos e temos un orzamento co que cumpriremos coas obrigacións da tempada, pero a xestión non é fácil e os actuais directivos teñen diñeiro comprometido co club mediante avais con patrimonio persoal", recalcou.

Sobre se estes días recibira notificación algunha de interesados en asumir a presidencia do Teucro, García-Alén asegurou que as únicas chamadas que recibiu foron dalgún "acredor acolloado" porque se ía. "Valóroo porque significa que confían en min, pero tiven que explicar que non hai ningún problema", matizou.